Eletrisidade Kontinua Sai Preokupasaun Povu Ataúro Atu Asesu Transmisaun Kopa Mundiál 2026

Turizmu Ataúro. Imajen/viajarentreviagens.pt

Díli, 29 Juñu 2026 (RAFA.TL)- Membru Komisaun E Parlamentu Nasionál (PN) ne’ebé trata asuntu Infraestrutra, Deputada Carminda Carlota, Segunda (29/06/2026), hato’o nia intevenzaun iha iha plenária hodi levanta preokupasaun povu Munisípiu Ataúro kona-báeletrisdade ne’ebé difikulta sira nia atividade no asesu ba  iha Kopa Mundial 2026.

Deputada Carminda Carlota husi Bankada CNRT ne’e hateten bainhira Komisaun E PN ba halo fiskalizasaun iha Ataúro, iha loron 17 fulan-Juñu ne’e, parte sira  komunidade kuazé antusiamu asiste Kopa Mundiál 2026, maibé dezafiu boot ida sira enfrenta mak eletrisidade mate beibeik ka lakan tuir nia tempu de’it, hahú iha tuku 12:00 kalan to’o tuku 06:00  dadeet.

“Ami rekomenda ba parte EDTL atu iha eventu Kopa Mundial EDTL tau konsiderasaun hodi nafatin fornese eletrisidade 24 oras iha teritóriu Ataúro. Hodi nune’e komunidade sira bele hetan oportunidade hodi asiste direita Kopa Mundial 2026,” Deputada Carminda Carlota propoin iha plenária PN.

Deputada ne’e afirma tuir nia observasaun  iha ámbitu Kopa Mundial 2026 antuziasmu husi komunidade sira barak mak asiste direta Kopa Mundial iha kanal Radiú Televizaun Timor-Leste  (RTTL,E.P) iha Munisipiú sira.

“Dala ida tán  Vise Ministru Asuntu Parlamentár hato’o hela povu Ataúro nia lia menon ne’e ba Ministériu Obras Públiku (MOP), hodi bele halakan eletrisidade 24 oras durante  Kopa Mundial,” nia hateten.

Iha fatin hanesan reprezentante Governu iha Parlamentu Nasionál Vise-Ministru Asuntu Parlamentár Adérito Hugo da Costa hatete, nia parte rejista kona-bá preokupasaun   eletrisidade populasaun iha Munisípiu Ataúro.

“Deputada sira akompaña karik Ministériu Obras Públiku, depois EDTL mós iha hela planu atu aumenta obra eletrifikasaun nian iha illa Ataúro, aguarda hela prosesu finalizasaun eletrisidade sentral iha Comoro final no tuir programa EDTL no MOP atu tau atensaun mós ba Ataúro hodi harii mós mini sentral eletrisidade iha ne’ebá nune’e bele kobre ona 24 oras,” informa Vise-Ministru Asuntu Parlamentár ne’e hateten.

Jornalista : Zita Menezes/Editór: Vito Salvadór