PNTL Detein Indonéziu Na’in-61 Deskonfia Envolve Scam Call Centre iha Tibar

Polísia detein Indonéziu na'in-61 ne'ebé deskonfia envolve iha atividade scam cal centre iha Tibar, Sesta 26 Juñu 2026.

Díli, 26 Juñu 2026, (RAFA.TL)–Autoridade Servisu Investigasaun Kriminál,  Polísia Nasionál Timor-Leste (PNTL), Sesta (26/06/2026), detein Indonéziu na’in-61 ne’ebé deskonfia envolve iha atividade  scam call centre iha área Tibar, Munisípiu Liquiça.

Porta-vóz PNTL, Superintendente Xefe Polísia João Belo dos Reis,  ba jornalista sira  iha Díli,  haktuir operasaun ne’e hala’o bainhira PNTL simu informasaun husi komunidade ne’ebé deskonfia forte Indonéziu sira ne’e hala’o atividade scam call centre.

“Liu husi informasaun ne’ebé ami simu, ekipa Servisu Investigasaun Kriminál tun ba fatin refere atu halo verifikasaun. Iha ne’ebá, ami haré movimentu suspeitu sira-nian no deside halo intervensaun imediata,” João Belo dos Reis hateten.

Bazeia ba informasaun ne’ebé PNTL  simu  no liuhosi operasaun iha lokal krime hetan sidadaun Indonézia hamutuk na’i- 61 iha uma ida, ne’ebé deskonfia hela hala’o atividade scam call center.

Tuir nia, ekipa husi diresaun Nasionál Servisu Investigasaun Kriminál (DSIK) tun ba fatin no hetan sidadaun Indonézia na’in-61 iha edifísiu ida ne’ebé deskonfia uza hanesan fatin operasaun call centre ilegal.

“Operasaun ne’e hala’o depois ami simu informasaun husi ami nia informadór sira no husi komunidade. Bainhira ami to’o iha fatin, ami hetan sidadaun Indonézia na’in-61 ne’ebé deskonfia hala’o atividade scam call centre,” João Belo dos Reis haktuir.

Sidadaun Indonésia na’in-61   ne’e kompostu  husi mane na’in-44 no feto na’in-17. Agora  dadaun PNTL lori sira mai iha  Komandu Jerál PNTL  iha  Diresaun Investigasaun Kriminál halo indentifikasaun .

João Belo dos Reis  hateten durante prosesu indentifikasaun no investigasaun, hatudu  katak ssupeitu na’in -hitu  uluk halo atividade scam call  centre iha Kambódia, depois rede krime ne’ebá sobu,  sira na’in -hitu ne’e halai mai Timor-Leste.

Informasaun ne’ebé PNTL hetan  katak husi  sidadaun Indonézia na’in-61 ne’e, balu   tama mai Timor-Leste iha fulan-Janeiru no  balun tama iha fulan-Fevereiru 2026.

Durante operasaun no busk aba lokal krime, parte autoridade sira halo mós apreensaun ba  prova  sira hanesan aparellu pasaporte  66, telemóvel, laptop no ekipamentu eletróniku seluk ne’ebé fasilita  atividade scam call centre ka jogu online.

Superintendente Xefe Polísia João Belo dos Reis informa atividade ne’ebé  halo iha Tibar ne’e, hanesan ho kazu jogu online scam call centre ne’ebé uluk akontese iha Otél Oé-Upu, Rejiaun Administrativu Espesiál Oé-Cusse Ambeno (RAEOA).

Jornalista: João Carlos/Editór: Vito Salvadór