Ramos-Horta Despede Nia Antesesór Lú-Olo Hodi Fó Omenajen Ba Sakrifisiu Ne’ebé Saudozu Halo Ba Timor-Leste

Prezidente Repúblika, José Ramos-Horta, halo despedida ofisiál no fó onra ba ninia antesesór, Francisco Guterres “Lú-Olo”, Sesta 26 Juñu 2026.

Díli, 26 Juñu 2026 (RAFA.TL)– Prezidente Repúblika, José Ramos-Horta, halo despedida ofisiál no fó onra ba ninia antesesór, Francisco Guterres “Lú-Olo”, ho saudasaun ne’ebé naruk durante serimónia omenajen badak iha Palásiu Prezidensiál, destaka ninia “dedikasaun totál ba kauza autodeterminasaun no independénsia” ba Timor-Leste.

Iha momentu simbolizmu institusionál ne’ebé kle’an, Ramos-Horta hanoin hikas legadu sira eis-Prezidente Lú-Olo nian ne’ebé kontribui ona ba povu no nasaun.

“Ami hanoin ita-nia dedikasaun ba povu no ba nasaun, nune’e mós ita-nia kompromisu ne’ebé la nakdoko hodi defende direitu umanu sira, dame, dignidade, no moris di’ak hosi povu Timor-Leste nian,” Prezidente Republika José Ramos-Horta hatete iha Palásiu Prezidensial, Sesta (26/06/2027), hodi husu minutu ida silénsiu hodi fó omenajen iha memória Lú-Olo nian antes despede pesoalmente ba kaixaun.

Prosisaun funeral to’o iha Palásiu Prezidensiál Nicolau Lobato hafoin presta omenajen ba Lú-Olo iha sede Komité Sentrál FRETILIN (CCF) no kuartél Jenerál FALINTIL-Forsa Defeza Timor-Leste (F-FDTL).

Karreta Funerariu ne’ebé trnasporta Lú-Olo nia kaixaun tama iha resintu Palásiu nian, hale’u bandeira Timor-Leste nian, no para ho nia odamatan kotuk nakloke diretamente iha edifísiu nia odamatan prinsipál nia oin.

José Ramos-Horta tun hosi eskada sira no hamriik hateke ba kaixaun, hodi kaer saudasaun naruk ida hodi fó onra ba nia antesesór, molok hakru’uk hodi fó respeitu ba Lú-Olo bainhira hahú nia viajen ikus.

Serimónia iha Palásiu konklui ho despedida no saída hosi kaixaun, akompaña ho interpretasaun ida hosi “Nearer, My God, to Thee” tuir versaun hosi André Rieu.

Husi Aitarak Laran, prosisaun kontinua ba Katedral Díli ba misa funerál, molok kontinua ba Parlamentu Nasionál no ba Jardin Eroi sira-nian ha Metinaro.

Jornalista: Remigia Locatelli/Editór: Vito Salvadór