PNTL Sei Blokeia Temporariu Estrada Públiku Durante Serimónia Transladasaun Restus Mortais Saudozu Lú-Olo

Rute transladasaun restus mortais Saudozu Francisco Guterres "Lú-Olo, Sesta-feira, 26 Juñu 2026.

Díli, 25 Juñu 2026 (RAFA.TL)- Porta-vóz Komandu Jerál Polísia Nasionál Timor-Leste (PNTL), Superintendente Xefe Polísia, João Belo dos Reis, informa katak iha Sesta, 26 Juñu ne’e,  PNTL, liu husi Komandu Polísia Díli sei halo blokeiu tráfiku temporáriu ba rute husi área Farol Tasi Ibun, Praia dos Quequeirus, Aimutin iha Sede Comite Central FRETILIN, Fatuhada, Kuartel Jerál F-FDTL,  Palasiu Prezidensiál to’o Igreja Katedrál hodi fasilita movimentu transladasaun restus mortais Saudozu Francisco Guterres Lú-Olo ho seguru.

“Komandu Díli sei koloka hotu membru sira atu hamrik iha rute sira ne’ebé deside ona atu fó seguransa ba movimentu lori Saudozu Lú-Olo nia isin-mate. Ita halo ona mapamentu rute ne’ebé Sesta-aban sei uza hodi halo movimentu ba ita nia Eis-Prezidenti Republika, Saudozu Francisco Guterres Lú-Olo nian ne´ebé husu apoiu sidadaun hotu-hotu ba fatin ne’ebé mak aban sei blokeia ho temporariu bainhira hotu ona sei loke fila ba públiku,” Superintendente Xefe Polísia João Belo dos Reis informa ba jornalista sira, Kinta (25/06/2026)..

Superintendente Xefe Polísia ne’e hatutan sei reforsa seguransa tan husi Polísia Komandu Jerál PNTL, Unidade Espesial Polísia, Unidade Polísia Maritima no mós Falintil-Forsa Defesa Timor-Leste atu asegura moveimentu rute husi Aimutin Sede CCF, Kaurtel Jenerál F-FDTL, Palásiu Prezidensiál, Igreja Katedral, to’o fatin sermonia funebre Saudozu Lú-Olo nian  iha Jardim dos Herois, Metinaro.

Porta-voz PNTL hatete operasaun seguransa ne’e envolve elementu sira husi unidade diferente, inklui polísia tránzitu, unidade patrullamentu no ekipu seguransa espesiál sira.

Objetivu prinsipál mak atu garante prosesutransladasaun  kadáver  saudzu Lú-Olo nian lao ho respeitu no laiha perturbasaun.

“Apela ba públiku atu tuir orientasaun hosi ajente sira iha terrenu, labele para iha fatin ne’ebé bele impede movimentu konvoi no mantein ordem durante serimónia nasional ne’e,” João Belo dos Reis afirma.

Iha resintu Farol korpu diplomátiku, veteranu, reprezentante relijiozu sira no membru komunidade husi parte oioin kontinua fó omenajen no respeitu ikus ba saudozu Francisco Guterres Lú-Olo. Sira-nia prezensa hatudu respeitu boot no rekuiñesimentu ba nia kontribuisaun, sakrifísiu no lideransa ne’ebé dedika an tomak ba luta libertasaun no dezenvolvimentu Timor-Leste.

Jornalista: João Carlos/Editór: Vito Salvadór