Alkatiri Deklara Lú-Olo Nia Mate Hanesan Lakon Boot Ida Ba Povu

Sekretáriu Jerál FRETILIN, Mari Alkatiri halo konferénsia imprensa iha Maktoban Francisco Guterres Lú-Olo nia rezidénsia, Kuarta 24 Juñu 2026.

Díli, 24 Juñu 2026 (RAFA.TL)- Sekretariu-Jerál Partidu Frente Revolusionária Timor-Leste Independente (FRETILIN), Mari Alkatiri, rekoñese katak ho Saudozu Francisco Guterres Lú-Olo nia mate hanesan lakon boot ida ba povu tanba ne’e tenke hamutuk hodi transforma situasaun triste ida-ne’e ba forsa.

“Ba povu tomak, aproveita situasaun ida-n’´e atu hotu-hotu hamutuk, transforma ita susar ba forsa. Saida maka susar ita tenke ho Maromak Nia ajuda transforma no fó forsa ba ita hotu tanba ita hatene katak sei iha dalan naruk para atu  lao hamutuk, ida-ne’e maka importante liubá povu tomak, importante liu ba kuadru no militante  FRETILIN nian,’’  Sekretariu Jerál Partidu FRETILIN Marí Alkatiri,  haktuir iha konferénsia imprensa iha rezidénsia saudozu Lú-Olo, Díli, Kuarta (24/06/2026).

Alkatiri hatutan motto FRETILIN nian “Unir para Transformar” tanba ne’e aproveita loron ida ne’ebé susar ba hotu-hotu, ba nia  espesialmente, ba família espesial liután susar, maibé tenke buka dalan atu transforma susar ne’e sai forsa.

“Ha’u koalia ho prezidenti FRETILIN Saudozu Lú-Olo kuaze loron-loron, nia sempre dehan ita rua ne’e enkuantu hamutuk, servisu, ida ba ona ida tenke hela kontinua servisu, ne’e mak nia hatete. Ha’u lembra fali mensajen  ida-ne’e, mensajen uluk  Prezidenti Nicolau Lobato hatete ba ha’u, obriga ha’u sai , ha’u dehan ita hahú hamutuk bele kontinua hamutuk, mehi iha ida-idak nia fatin, labele mate hotu dala ida,” Mari Alkatiri hateten.

Iha konferensia imprensa ne’e  fundadór RDTL ne’e ho emosaun hateten tanba saída nia mak tenke simu todan ida-ne’e, maibé prontu simu,  maibé so bele iha forsa bainhira militantes FRETILIN tomak fó forsa ba nia no bainhira povu tomak fó fiar ba nia.

Marí Alkatiri haktuir, durante nia hamutuk ho saudozu Lú-Olo hanesan ema ida ne’ebé moos tebes, transparante no korrupsaun ba nia laiha no sempre dehan katak buat ne’ebé iha ona  nia bikan labele  ba hasai tan iha ema seluk nia bikan.

Liu husi konferénsia imprensa sekretariu jerál  FRETILIN deklara katak, sei halot saudozu Francisco Guterres Lú-Olo nia restus mortais iha saudozu Fransisco Xaviér do Amaral no mós Saudozu José Antonio Gomes da Costa ‘’Mau Huno” nia klaran iha Jardim dos Herosi Metinaro.

Tuir orário ne’ebé governu aprova iha Konsellu Ministru  katak  Saudozu Fransisco Guterres Lú Olo nia  seromonia funebre sei hala’o iha Sesta  (26/06/2026) no misa Requem sei prezide husi Bispo Dioseze Baucau Dom Leadro María Alves iha Igreija Parokia Katedral,   Nossa Señora Imaculada Conseição Villa-Verde, Díli.

Jornalista: João Carlos/Editór: Vito Salvadór