Povu ho Matan-been Simu Kadaver Francisco Guterres Lú-Olo iha Aeroportu

Kadaver maktoban eis-Prezidente Repúblika, Francisco Guterres Lú-Olo to'o iha Díli, Tersa madrugada (23/06/2026).

Díli, 23 Juñu 2026 (RAFA.TL)- Kadaver Saudozu Francisco Guterres Lú-Olo to’o Timor-Leste ho Aviaun Aero Díli, iha Aeroportu Internasionál Prezidente Nicolau Lobato Díli, Tersa madrugada (23/06/2026), hale’u tuku 06:33 otl.

Maktoban Francisco Guterres Lú-Olo nia mate-isin simu direita husi Governu no família ho Parada Militar molok translada mai iha rezidénsia matebian nian iha Farol, Díli.

Saudozu hetan akompaña direita husi nia espoza Dona Cidália Lopes Nobre Mouzinho Guterres ho nia oan nain-haat, Francisco Cidalino Nobre, Nobrezino Guterres, Samd no Dália Luliana Nobre Guterres, ho mós Sekretariu Jerál Partidu FRETELIN, Mari Bin Amude Alkatiri.

Prosesu hatun kadaver husi aviaun Aero Dili hetan akompañamentu husi Primeiru-Ministru Interinu, Mariano Assanami Sabino, ho militar na’in-sanulu hodi lori ba iha parada fatin no entrega fali ba militar na’in-ualu hodi simu ho parada hafoin ne’e lori mate-isin ba iha fatin ne’ebe Governu prepara ona karru funerariu.

Iha aeroportu simu direita mós husi familia maktoban, reprezenta Prezidente Repúblika, Xefe Casa Sivil, eis-Prezidente Republika Taur Matan Ruak, membru Governu, membru Parlamentu Nasional, Tenente-Jeneral Falur Rate Laek, veteranu sira hanesan Lere Anan Timur, kuadru partidu FRETILIN, povu sira, inklui simpatizante partidu FRETILIN nian,

Iha Aeroportu Internasionál Prezidente Nicolau Lobato, povu sira ho emosaun no matan-been simu  Saudozu Farancisco Guterres Lú-Olo ne´ebé mos hanesan prezidente partidu FRETILIN to’o nia hakotu iis iha Ospitál Price Court iha Kuala Lumpur, Malázia iha tuku 22:00 oras Malázia, Domingu, 21 Júnu ne’e.

Iha dalan estudante ho kunidade sira kontinua forma no hein hodi hat’oo sira nia kondolénsia ba saudozu Francisco Guterres Lu-Olo.

Funsionáriu públiku no no autoridade lokal sira forma mós iha dalan hodi hatudu sira nia domin no respeitu ba maktoban hanesan eroi no lider nasionál ne’ebé kontribui ba Timor-Leste nia luta ba independensia to’o ekun an no kontinua kontribui iha faze liberta pvou husi mukit no ki’ak.

Situasaun trinteza ne’e lori saudade no lakon boot laos ba familia deit maibé ba nasaun no Povu be saudozu Francisco Guterres hadomi hodi servi desde luta ba independensia too ukun rasik an hodi assume mos kargu importante sira hanesan Prezidente Assembleia Konstituiante, Prezidente Parlamanetu nasional too kargu ikus liu hanesan Prezidente Republika.

To’o iha maktoban nia rezidénsia Farol simu ho liafuan bem-vindu husi nia alin Domigos Guterres hodi hamulak tuir lisan no ritual ne´ebé iha molok hodi saudozu tama ba uma laran hodi tau iha fatin ne´ebé prepara ona.

Tuir orariu ka programa ne’ebé fó sai ona husi Governu no família hamutuk ho Partidu FRETILIN, sei presta omenajen hahú husi Prezidensia Republika, Parlamentu Nasionál, Primeiru-Ministru, Prezidente Tribunal Rekursu, Konferensia Episkopal Timorense (Dioseze Dili, Maliana no Baucau), konfesoens relijiozu sira, eis-titulares, membru governu hamutuk ho instituisaun estadu no mos bainaka onsa sira seluk ne´ebé prezente liu husi sira nia reprezentante diplomatiku sira iha Timor-Leste.

Jornalista: João Carlos/Editór: Vito Salvadór