PM Xanana Reafirma Kompromisu Timor-Leste Ba Fortalesimentu Kooperasaun CPLP

PM Xanana vizita halo ofisiál bá sede CPLP iha Lisboa, Segunda (22/06/2026).

Lisboa, 22 Juñu 2026 (RAFA.TL)— Primeiru-Ministru (PM) Kay Rala Xanana Gusmão, reafirma kompromisu Timor-Leste nian atu hametin kooperasaun multilaterál no unidade entre Estadu-membru sira Komunidade Nasaun Sira Lían Portugés (CPLP).

Durante vizita ofisiál bá sede CPLP iha Lisboa, Segunda (22/06/2026), PM Xanana afirma iha nia intervensaun bá Reprezentante Permanente sira hosi Estadu-membru CPLP no Sekretária Ezekutiva CPLP, Maria de Fátima Monteiro Jardim, katak vizita ne’e iha signifikadu espesiál tanba CPLP selebra aniversáriu bá dala-30 hosi nia fundasaun.

“Selebrasaun ne’e sai oportunidade atu reafirma valór unidade iha diversidade no hametin lasu istóriku, kulturál no polítiku sira ne’ebé durante ne’e liga povu sira ne’ebé ko’alia Lian Portugés,” Xanana Gusmão hateten.

Primeiru-Ministru Timor-Leste konsidera katak situasaun internasionál atuál ne’ebé marka ho inserteza no instabilidade, halo nesesáriu atu reforsa liután multilateralizmu, diálogu no kooperasaun entre nasaun sira hodi responde bá dezafiu globál sira.

Durante enkontru ne’e, partisipante sira diskute kestaun estratéjika sira ne’ebé importante bá sidadaun CPLP nian, inklui mobilidade entre Estadu-membru sira, aprofundamentu integrasaun ekonómika no kooperasaun setoriál, no fortalese kolaborasaun iha área marítima no oseánika.

Primeiru-Ministru mós subliña importánsia atu aproxima CPLP bá rejiaun estratéjika sira seluk, partikularmente ASEAN, hodi alarga oportunidade bá kooperasaun no dezenvolvimentu entre povu sira.

Líder ne’e enkoraza CPLP, ne’ebé reprezenta populasaun millaun barak iha kontinente oioin, atu kontinua dezempeña papél relevante iha promosaun dignidade umana, páz, justisa no protesaun ambientál.

“Timor-Leste asume Prezidénsia Pro Tempore CPLP ho sentidu responsabilidade no fiar bá prinsípiu sira ne’e,” Xanana Gusmão subliña.

Iha remata, Primeiru-Ministru reafirma prontidaun Timor-Leste atu servisu hamutuk ho Estadu-membru no Observadór Asosiadu sira, no hato’o konvite bá membru CPLP hotu-hotu atu partisipa iha Reuniaun Konsellu Ministrus CPLP nian ne’ebé sei realiza iha Dili iha fulan Agostu 2026.

Vizita ne’e realiza iha kontestu Prezidénsia Pro Tempore CPLP ne’ebé Timor-Leste assume daudaun, no esforsu kontinuu atu hametin papél organizasaun ne’e iha promosaun kooperasaun, solidariedade no dezenvolvimentu sustentável entre nasaun membru sira.

Nune’e mós, Sekretária Ezekutiva CPLP, Maria de Fátima Monteiro Jardim elojia lideransa Timor-Leste iha ezersísiu Prezidénsia Pro Tempore CPLP no destaka kompromisu nasaun ne’e atu promove kooperasaun no unidade entre Estadu-membru sira.

Maria de Fátima Jardim haree katak Timor-Leste demonstra empeñu forte atu avansa prioridade sira CPLP nian, liu-liu iha área mobilidade, kooperasaun ekonómika, dezenvolvimentu sustentável no aproximasaun CPLP ho rejiaun estratéjika sira seluk.

Sekretária Ezekutiva CPLP reafirma apoiu Sekretariadu bá preparasaun Reuniaun Konsellu Ministrus CPLP ne’ebé sei realiza iha Dili iha fulan Agostu 2026 no manifesta konfiansa katak Timor-Leste sei kontinua kontribui bá fortalesimentu papél CPLP iha sirkunstánsia internasionál atuál.

Jornalista: Zita Menezes/Editór: Vito Salvadór