Aero Dili Take Off Ona iha Aeroportu Internasionál Prezidente Nicolau Lobato Ba Kuala Lumpur Tula Mate-Isin Eis-PR Lú-Olo

Aero Dili A320 take off ona iha Aeroportu Internasionál Prezidente Nicolau Loba ba Kuala Lumpur-Malázia hodi transporta mate-isin lider nasionál Francisco Guterres Lú-Olo.

Díli, 22 Júnu 2026 (RAFA.TL) – Aviaun Aero Dili ne’ebé estadu Timor-Leste  freta espesiál ba transporta mate-isin eis-Prezidente Repúblika, Francisco Guterres Lú-Olo, Segunda-kalan ne’e, hale’u tuku 19:10 Otl, take off ona iha Aeroportu Internasionál Prezidente Nicolau Lobato, ho distinasaun Kuala Lumpur-Malázia.

Tuir oráriu normal voo husi Díli ba Kuala Lumpur han tempu oras tolu liu minutu 40. Nune’e,  aviaun Aero Dili A320 sei to’o iha Aeroportu Internasionál Kuala Lumpur-Malázia, purvolta tuku 2:10 madrugada oras Malázia, Tersa-feira, 23 fulan-Juñu ne’e.

Iha tuku 3:30 madrugada, Aviaun Aero Dili ho baindeira RDTL transporta mate-isin lider nasionál  Francisco Guterres Lú-Olo hamutuk ho faluk Cidália Lopes Nobre Mouzinho Guterres, oan husi saudozu, no familia sira seluk mai Timor-Leste no sei to’o iha Aeroportu Internasionál Prezidente Nicolau Lobato, Díli, purvolta tuku 6:30 Oras Timor-Leste (Otl).

Mate-isin Prezidente partidu FRETILIN, Francisco Guterres Lú-Olo, to’o iha Aeroportu Prezidente Nicolau Lobato sei lori liubá maktoban  nia uma iha Farol, no detallu finál sei define depois ho faluk, família, responsavel partidu no autoridade Timor-Leste sira.

Molok ne’e, Sekretáriu-Jerál partidu FRETILIN, Mari Alkatiri  ne’ebé daudaun ne’e hamutuk ho família maktoban Francisco Guterres Lú-Olo iha Hospital Prince Court-Malázia, informa  ba Rafa.tl  katak  aviaun Aero Dili la’ós transporta de’it maktoban Francisco Guterres Lú-Olo, maibé mós  faluk Cidália Lopes Nobre Mouzinho Guterres, oan husi saudozu, no familia sira seluk.

Mari Alkatiri mós sei akompaña mate-isin saudozu nian mai Timor-Leste, tanba antes ne’e nia iha Kuala Lumpur hodi akompaña Prezidente FRETILIN durante tratamentu intensivu iha Hospital Prince Court, to’o husik is iha Domingu, 21 fulan-Juñu ne’e.

Governu Timor-Leste rasik deklara tiha ona lutu nasional, ne’ebé hahú Segunda-feira, husi tuku 15:00 no sei kontinua to’o tuku 00:00 loron 28 fulan-Juñu ne’e.

Detallu sira kona-bá programa funebre ofisiál seidauk publika husi autoridade sira ka família.  Maibé, tuir fonte balun ne’ebé Rafa.tl asesu, sei iha omenajen iha Palásiu Prezidénsia Repúblika, Parlamento Nasional, Kuartel Jenerál FALINTIL-Forças de Defesa de Timor-Leste (F-FDTL), no mós Sede Komité Sentrál FRETILIN (CCF) iha Díli.

Prezidente Repúblika, José Ramos-Horta, hateten ba Rafa.tl katak mate-isin sei simu husi Guarda de Honra F-FDTL iha aeroportu, no funerál sei hala’o iha Jardim dos Heróis, Metinaro.

Lú-Olo, moris iha loron 7 Setembru 1954 iha Ossú, Munisípiu Viqueque, dedika nia aan iha ai-laran durante tinan 24 iha rezisténsia armada durante okupasaun indonézia.

Nia mak komandante ida husi komandante haat ne’ebé hela to´o hotu iha ai-laran durante períodu luta tomak, no lidera polítika rezisténsia armada depoizde Xanana Gusmão hetan kapturasaun iha 1992 no Konis Santana mate iha 1998.

Nu’udar prezidente Assembleia Konstituinte, Lú-Olo mak proklama Restaurasaun Independénsia Repúblika Demokrátika Timor-Leste iha meia-noite 20 Maiu 2002, no mós fó pose ba Xanana Gusmão nu’udar Prezidente Repúblika  periódu 2002-2007.

Lú-Olo mós  nu’udár prezidente Parlamentu Nasionál husi 2002 to’o 2007, no eleitu Prezidente Repúblika  periódu iha 2017-2022.

Jornalista: João Carlos/Editór: Vito Salvadór