Preokupa ho El Niño, Prezidenti Repúblika Husu Governu Halo Asaun Urjente

Prezidente Repúblika, José Ramos-Horta, konvoka sorumutu ida ho membru governu tutela no organizasaun internasionál sira hodi alerta no hato’o nia preokupasaun kona-ba impaktu hosi El Niño iha Timor-Leste, Sesta 19 Juñu 2026.

Díli, 19 Juñu 2026 (RAFA.TL)-  Prezidente Repúblika, José Ramos-Horta, Sesta (19/06/2026), konvoka sorumutu ida ho membru governu tutela  no organizasaun internasionál sira hodi alerta no hato’o nia preokupasaun kona-ba impaktu hosi fenómenu El Niño iha Timor-Leste, no deskreve situasaun ne’e hanesan “grave tebes”. Nune’e husu planu asaun urjente hodi proteje populasaun sira.

Prezidente Repúblika José Ramos-Horta hato’o nia preokupasaun ne’e hafoin simu informasaun husi ajénsia meteorolójiku internasionál sira kona-bá eskala hosi fenómenu El Niño ne’ebé sei akontese iha tinan ne’e no sei afeita mós ba Timor-Leste.

Tuir Xefe Estadu, ida-ne’e hanesan El Niño boot liu ne’ebé rejista dezde tinan 1870, ne’ebé laiha paralelu iha tinan 150 ikus ne’e, komparavel ho fenómenu ho eskala globál ne’ebé peritu balun hanaran ona “Godzilla El Niño” tanba nia medida no kbiit destrutivu.

“Fenomenu El Niño atu hahú maka’ás iha fulan-Jullu, sei durasaun tinan ida, sei laiha bee, rai sei maran, bee-matan sira sei maran, mota sira sei maran, no ida-ne’e sei iha impaktu boot ba agrikultura. Animal sira sei mate. Saida mak bele halo salva ema primeiru sira foho liliu aldeia dook teb-tebes, ne’e responsabilidade estadu tenke haré tanba ne’e alerta kedas,” José Ramos-Horta hateten.

Ramos-Horta  hatutan antes ne’e fo hanoin ona ba ema hotu atu labele tesi ai arbiru, estraga bee, bainhira tama iha tempu bain-loron mosu fenomenu rai manas afeta rai maran, bee maran, implika ba agrikultura, animal no mós ba ema liu-liu ba labarik estudante sira tanba sei laiha bee-moos.

Xefe Estadu husu mós ba Governu atu deside tau orsemantu espesiál ba El Niño, para kria ekipa avansadu ida espesiál ida ba El Niño, atu halo preparasaun ne’ebé di’ak no kooperasaun entre Governu, komunidade no parseiru dezenvolvimentu sira, hodi asegura impaktu husi fenómenu El Niño iha Timor-Leste.

Jornalista: João Carlos/Editór: Vito Salvadór