DNTT Klarifika Taxa Administrativu Aumenta Tanba Dokumentu Transporte sira Prazu Ona no La Renova Tuir Loron Inspesaun

Diretora Diresaun Nasionál Transporte no Terrestre (DNTT), Maria Antónia Victor da Costa.

Díli, 16 Juñu 2026 (RAFA.TL)- Diresaun Nasionál Transporte no Terrestre (DNTT), klarifika ba publiku relasiona ho taxa administrativu ba transporte sira sa’e tanba tuir regulamentu foun DNTT no Decreto-Lei nú. 17/2026, sei aplika taxa doubru ba transporte sira dokumentus liu prazu no la renova tuir loron inspesaun.

Diretora Diresaun Nasionál Transporte  no Terrestre (DNTT), Maria Antónia  Victor da Costa ba jornalista sira iha  edifisiu DNTT, Díli, Tersa (16/06/22026), haktuir iha taxa administrativu foun ba rejistu veíklu (STNK) ba motorizada ho kustu $14 no karreta $20, bainhira dokumentu liu fulan ka tinan motór sei selu doubru husi taxa normal, signifika ba motorizada sei kona $32 no karreta  60.

“Motór ho karreta nain sira durante ne’e ita haré hanesan realidade n’´ebé hatudu dadauk iha semana kotuk, ita nia komunidade mai trata dokumentu iha ne’e maioria dokumentu mate hotu. Signifika durante ne’e sira la fó importánsia ba trata dokumentu sira hanesan inspesaun ba karreta no motór tamba ne´e bainhira sira mai trata ho lei foun otomatikamente nia kustu ne´e sa’e,” Maria Antónia  Victor da Costa esplika.

Bazeia ba Dekretu-Lei Kódigu de Estrada artigu 110 temi dehan katak karreta ho motór hotu-hotu tenke mai halo inspesaun iha DNTT hodi sertifika kondisaun ne’ebé mak di’ak bainhira halo sirkulasaun.

Nia argumenta kona-bá taxa ne’ebé mak iha ne’e nia kutu ka valor boot liu iha penalidade (multa) bainhira motór ho karreta nain sira mai halo tratamentu dokumentu iha los nia tempu ne’ebé mak determina sira la kona multa, maibe sekraik kontra fali ida ne’e hanesan dokumentu liu prazu sei kona pena.

“Tuir proposta lei sira ne’e lori ba iha Konsellu Ministru hetan aprovasaun depois lori ba Prezidenti Republika promulga hodi publika iha Jornal da Republika entaun tama ona  vigor liu fulan ida tenke implementa ona, tanba antes ne’e DNTT  halo sosializasaun liu husi pajina ofisial DNTT no mós taka informasaun iha Edifisiu Diresaun Nasionál Transporte Terrestre iha Caicoli, Kampung Baru, Akanunu no iha munisípiu sira,”  Maria Antónia  Victor da Costa hateten.

Iha fatin hanesan, Balbina Maria da Silva, nu’udár karreta nain triste ho taxa ne’ebé DNTT implementa fó implikasaun boot ba sira-nia rendimentu.

“Uluk lisensa ba sertifikadu inspensaun (KIR) ami selu ami selu $20, agora mai fali iha ne’e sae fali halo ha’u hakfodak, tama iha ne’e lisensa $35, ne’ebé karreta rua hamutuk $95. Haré ida-ne’e ami triste,” Balbina Maria da Silva hateten.

Karreta nain ne’e mós husu ba Governu atu hatun fila fali  tanba nu’udar povu ki’ik atu ba buka moris hanusa atu lori osan iha ne’ebé atu halo atendementu ba familia.

Jornalista: João Carlos/Editór: Vito Salvadór