Membru PN Husu Governu Apliká Taxa Ba Empreza no Loja sira Ne’ebé Soe Lixu Arbiru

Membru PN husi Bankada CNRT, Maria Ángela Corvelho.

Díli, 15 Juñu 2026 (RAFA.TL)- Reprezentate povu iha Parlamentu Nasionál (PN) husu Governu aplika taxa ba kompaña no loja sira ne’ebé soe lixu arbiru tanba fó impaktu la di’ak ba saúde públiku.

Membru PN sira leventa kestaun ne’e tanba tuir observasaun iha terrenu reprezentante povu sira nota katak loja sira iha sidade Díli mak kontribui lixu barak liu kompara ho komunidade sira.

Membru PN husi Bankada CNRT, Maria Ángela Corvelho, liuhosi nia intervensaun plenária, Segunda (15/06/2026), fó apresiasaun ba grupu joven sira ne’ebé voluntarimente iha konsiénsia no hadomi natureza hodi halo limpeza iha sidade Díli laran hodi hamos foer ne’ebé komunidade no loja  sira so’e arbiru.

“Iha semana kotuk sira deteta loja boot sira iha Díli laran so’e lixu, frasku ka vidru, hena no  kaixa ba fali valeta laran. Tanba ne’e husu atensaun ba autoridade Díli kontrola loja boot sira, sé bele apliká taxa bainhira loja sira soe lixu arbiru,” eputada Maria Ángela Corvelho afirma.

Xefe Bankada PLP, Maria Angelina Sarmento nia observasaun  nota buat ne’ebé Governu falta atu halo iha rai-laran mak sei menus  kontrolu  ka  supervizaun ba loja sira, no mós seidauk  iha baze dadus ne’ebé di’ak atu kontinua halo kontrolu ba loja sira ne’ebé iha risku aas la kumpri sira nia obrigasaun atu bele so’e lixu tuir nia fatin.

“Sé karik sira so’e lixu la tuir regra no lei ne’ebé iha sira tenke multa, entaun Governu tenke iha ona dadus hodi identifiká kompaña ka loja sira ne’ebé tama iha riskú aas halo inkumprimentu ba sira nia obrigasaun,” Deputada Maria Angelina Sarmento  haktuir iha plenária ordem do dia  PN.

Ministériu ne’ebé iha  kompeténsia mak hanesan  Ministériu Ambiénte, Ministériu asuntu Ekonomia no presiza iha  kooperasaun ho Ministériu Finansa hodi bele  apliká taxa ba loja sira ne’ebé mak so’e lixu arbiru.

Deputada Maria Angelina Sarmento esplika Minitériu Finansa mak entidade ida ne’ebé rekolla reseita sira kuandu taxa sira ne’e kompaña ho loja sira ne’e selu nia mós aumenta ba reseita domestiká.

Hatán ba kestaun reprezentante Governu iha Parlamentu Nasionál  Vise-Ministru Asuntu Parlamentar Adérito da Costa Hugo informa  nia parte sei envia asuntu ne’e ministériu relevante hodi bele fó atensaun ba loja sira ne’ebé mak so’e lixu arbiru.

Jornalista : Zita Menezes/Editór: Vito Salvadór