Empreza Grupu ETO Loke Postu Abastesimentu Kombustível iha Batugade

Empreza Grupu ETO ofisialmente loke postu abastesimentu kombustível foun iha Batugade, Sábadu 13 Juñu 2026.

Bobonaro, 14 Juñu 2026 (RAFA.TL)– Empreza Grupu Esperança Timor Oan (ETO), Sábadu (13/06/2026), ofisialmente loke postu abastesimentu kombustível foun iha área Nubadak, Suku Batugade, Postu Administrativu Batugade, Munisípiu Bobonaro.

Inisiativa ida-ne’e hanesan parte husi estratéjia ETO atu habelar asesu kombustível ba komunidade sira iha área fronteira no hamenus difikuldade transportasaun kombustível ba utilizadór sira.

Iha serimónia bensaun no inagurasaun ba postu abastesimentu kombustível ne’e, Pe. Mario do Rosario Costa, SDB hateten Esperança Timor Oan ne’e hanesan Jakeu ne’ebé promesa ba Jesus hakarak fahe nia riku-soin balun ba ema sira ne’ebé presiza. Tanba fatin abastesimentu kombustível ida -e’e hanesan uma  no fatin atu serbí mau-alin sira.

Saserdote ne’e hateten kolaboradór sira ne’ebé servisu iha Postu Abastesimentu Kombustível iha Batugade atu servisu ho onestidade ho responsabilidade atu respeitu kliente sira.

“Fatin ida-ne’e sai fatin ne’ebé prátika onestidade no responsabilidade. Respeita ema ne’ebé servisu, no mós respeita kliente sira ne’ebé tama no sai iha fatin ida-ne’e ho responsabilidade,” Amu Mario do Rosario Costa, SDB hateten iha nia reflesaun bensaun nian.

Saserdote ne’e esplika postu abastesimentu kombustível ne’e la’ós  atu buka lukru, maibé atu serbí maluk sira no fó kampu servisu ba maluk sira.

Iha fatin hanesan, Xefe Administrasaun ETO, Jacinto Noronha, esplika katak postu abastesimentu kombustível ida-ne’e konstrui durante tinan rua ho balun, foin remata no foin halo abertura tanba ne’e husu kolaboradór sira atu serbí diak liután kliente sira no komunidade.

“Espera katak projetu ida-ne’e bele serbí di’ak liután komunidade sira iha área Bobonaro, ho negosiante ema abulante sira ne’ebé maka liu husi Estrada protokolu husi Dili ba fronteira Batugade, no liubá Bobonaro,” Jacinto Noronha hateten.

Jacinto Noronha husu ba kolaboradór sira ne’ebé servisu iha ne’e atu konsidera fatin ida-ne’e hanesan sira nian, la’os Sr. Nilton Telmo Gusmão dos Santos nian de’it, maibé hotu-hotu hanesan mós nain ba ba fatin ida ne’e.  tanba ne’e, labele estraga sasán sira, infraestrutura no tau matan didi’ak  tanba husi kakuluk ida ne’e mak kada fulan bele fó han ita. La’ós mai buka lukru bo’ot, maibé bele foóservisu ba alin sira ne’ebé mak hela iha ne’e.

Responsavel Postu Abastesimentu Kombustível Batugade, Abel Sanches agradese ba Empreza ETO ne’ebé bele loke ona postu  kombustível hodi fó kampu servisu ba sira.

“Ami orgullu tebes ba empreza ETO, ne’ebé mak loke no  oferese ba ami nain hira servisu iha ne’e. ida-ne’e hanesan apresiasaun bo’ot tebes kontribui ona rekursu ki’ik mai ami nain hira iha ne’e no ba oin ami tau matan di’ak ba fatin ida-ne’e hodi fó atendementu di’ak ba kliente sira hetan satisfasaun,” Abel Sanches hateten.

Kolaboradór sira ne’ebé servisu iha Postu Abastesimentu Kombustível ETO Batugade hamutuk na’in-ualu kompostu husi operadór na’in-neen no seguransa na’in-rua.

Hafoin serimónia inaugurasaun ba Postu Abastesimentu kombustível ne’e ofisialmente loke kedas ba kliente sira hodi enxe gazuliña ho gazoleu ne’ebe kada litru  ba gazoliña US$1,39/litru  no Gazuleo $1.49/litru.

Jornalista: João Carlos/Editór: Vito Salvadór