MP Lansa Revista Rasik Hodi Reforsa Transparénsia, Prosimidade no Sidadania

Serimonia lansamentu revista MP, Sesta 12 Juñu 2026.

Díli, 12 Juñu 2026 (RAFA.TL)- Ministériu Públiku (MP), Sesta (12/6/2026), lansa nia revista rasik atu reforsa transparénsia, prosimidade no sidadania liuhosi divulgasaun atividade sira Prokuradória Jerál Repúblika no Prokuradória Repúblika Primeira instánsia sira nian.

“Revista ne’e hanesan plataforma ida atu divulga peskiza, análize jurídiku, no kontribuisaun akademika ba fortalesimentu sistema justisa. Lansamentu ne’e fó sinal klaru ba kompromisu Ministério Públiku atu promove transparénsia, edukasaun legál, no partilla koñesimentu,” Prokuradór Jerál Repúblika, Nelson Carvalho informa iha ámbitu lansamentu revista MP nian ne’e.

Nia esplika revista trimestrál ne’e, hakarak atu sai nu’udar espasu ida ba informasaun no reflesaun kona-bá papél Ministériu Públiku nian iha administrasaun justisa.

Iha revista ne’e sei ko’alia kona-ba inisiativa sira Prokuradór-Jerál Repúblika nian, Adjuntu sira Prokuradór-Jerál Repúblika nian no Servisu Sentrál tolu Prokuradoria Jerál Repúblika nian  hanesan kontensiozu Estadu no Interese Koletivu no Difuzu sira, Gabinete Kooperasaun Judisiária, Direitu Komparadu no Relasaun Internasionál sira, no Gabinete Kombate hasoru Korrupsaun no Kriminalidade Organizadu  no kontribuisaun esensiál Servisu sira Apoiu Tékniku no Administrativu nian.

“Revista ne´e mós la’ós fó sai de’it faktu sira hodi kumpre misaun pedagójika no sívika ida atu esplika atribuisaun no kompeténsia hosi órgaun no servisu sira Ministériu Públiku nian ne’ebé instala ona, hodi fasilita asesu ba lei no justisa, no reforsa konsiénsia katak ne’e mak direitu fundamentál sidadaun sira nian,” PGR Nelson de Carvalho hateten.

PGR Nelson de Carvalho salienta bainhira Supremu Tribunál Justisa no Tribunál Rekursu ofisialmente estabelese ona sei estabelese mós Prokuradoria Repúblika Rekursu nian. Medida sira kona-bá ida-ne’e Prokuradoria-Jerál Repúblika foti daudaun hela, nune’e hein katak, iha edisaun sira revista ida ne’e nian tuirmai, bele fó sai mós atividade sira Prokuradoria Repúblika Rekursu nian , hodi hariku liutan konteúdu publikasaun ida ne’e nian.

Adjuntu Prokuradór Jerál  Repúblika, Pascácio de Rosa Alves hatete revista ida ne’e  nia pontu inportante haat, ne’ebé relativamente ho servisu sira Ministériu Públiku nian.

“Revista ne’e relativa ho servisu gabinete iha Prokuradoria-Jerál, kona-bá Prokuradoria de Primeira Instánsia, aborda mós kona-bá atividade sira Gabinete Prokuradoria Jerál Repúblika no Gabinte Sentrál sira no mós koalia kona-bá atividade sira ne’ebé mak hala’o husi Prokuradoria Primeira Instansia sira,” Adjuntu Prokuradór Jerál  Repúblika, Pascácio de Rosa Alves esplika.

Iha fatin hanesan, Adjuntu Provedór Direitu Umanu no Justisa, Rigoberto Monteiro husu mós ba Ministériu Públiku atu kria mekanizmu sira  ne’ebé adekuadu no asesivel liu ba sosiedade sira atu asesu ba justisa.

“Ami halo levantamentu dadus balun ne’ebé relevansia ba detidu, prizoneiru sira lahetan asistensia husi defensór no prokuradór sira, husi buat sira ne’e, entaun ha’u hanoin importante atu defensora publika no prokuraóor jerál sira halo atendementu ba ita nia sosiedade hodi esplika ho detallu,” Rigoberto Monteiro hateten.

Nia hatutan, Ministériu Públiku iha obrigasaun atu halo esplikasaun sira ho detallu hodi labele viola sidadaun sira nia diretu asesu ba justisa.

 Jornalista: João Carlos/Editór: Vito Salvadór