PNTL ho Alfándega Halo Apreensaun Ba Sigaru Karton 830 iha Portu Tibar

Polísia hatun sigaru sira ne'ebé importa ilegál mai Timor-Leste liu husi Portu Tibar, Tersa 9 Juñu 2026.

Díli, 09 Juñu 2026 (RAFA.TL)- Polisia Nasionál Timor-Leste (PNTL) ho ofisiál Alfándega sira halo apreensaun ba sigaru karton 830 iha Portu Tibar tanba tama mai teritóriu nasionál Timor-Leste la tuir prosedimentu no lei ne’ebé vigora.

Porta-vóz Komandu Jerál PNTL, Superitendente Xefe Polísia João Belo dos Reis, Tersa (09/06/2026), informa sigaru sira-ne’e deskonfia tama mai husi rai-li’ur no la tuir prosedimentu Alfándega ne’ebé vigora iha Timor-Leste.

Nia hatutan durante fiskalizasaun no inspesaun iha área karga Portu Tibar, ekipa PNTL no Alfándega identifika kontentór ida ne’ebé rai sigaru ilegál ne’ebé la tuir manifestu ka dokumentu ne’ebé iha ho nune’e halo kedas apreensaun imediata ba sigaru karton hamutuk 830.

“Autoriedade Aduanera Alfándega fó kedas informsaun ba ekipa servisu investigasaun kriminal hodi akompaña halo verifikasaun ba dokumentu sira hotu ne’ebé tama, depois  loke kontentór, identifika katak manifestu ka lisensa atu hatama sasán ne’e iha meza ho kadera, maibé kuaze iha laran sigaru iha karton 380,” Superitendente Xefe Polísia João Belo dos Reis informa.

Porta-vóz Komandu Jerál PNTL ne’e afirma sigarru sira ne’e illegal, laiha lisensa ne’ebé  sei prende lori mai iha Komandu Jerál iha Diresaun Servisu Investigasaun Kriminál hodi prosesu ba iha Ministeriu Públiku no kazu ne’e rasik rejista ona Númeru Uniku Krime  (Nuc) 0207/26.PNSIC.

Tuir informasaun  Polísia nian katak, nain ba sasan sigaru ne’e sidadaun Xinés mak haruka mai ba kompañia Timoroan ida no autoridade seguransa liu husi DSIK bolu ona Timoroan ne’e hodi halo identifikasaun ne’ebé kontinua halo trekking ba fatin sira ne’e hodi halo investigasaun atu hatene sese mak involve iha laran.

Sigaru ne’e nia orijin hatama husi  Kambodia, produsaun sira ne’e nafatin sai preokupasaun ba públiku  tanba ema nafatin importa sigaru illegál mai iha Portu Tibar, ne’ebé tenta atu lori mós ba iha merkadu sira iha munisípiu.

Jornalista: João Carlos/Editór:  Vito Salvadór