Rai-Nakdoko ho Magnitude 7,8 iha Filipina, Alerta Tsunami

Rai-nakdoko ida ho magnitude 7,8 akontese iha loron-segunda ne'e iha rejiaun Mindanao, iha súl Filipina nian, haktuir hosi Servisu Jeolójiku Estadus Unidus nian (USGS). Imajen/Ajénsia Informasaun Filipina

Díli, 8 Juñu 2026 (RAFA.TL)–Rai-nakdoko  ho magnitude 7,8 akontese  iha rejiaun Mindanao, iha súl Filipina nian,  halr’u tuku 07:37 dadeer, oras lokál, Segunda (8/6/2026).

Informasaun  hosi Servisu Jeolójiku Estadus Unidus nian (USGS) hasai ona alerta sira tsunami nian iha nasaun no viziñu Indonézia no mós iha Japaun.

Sita husi Ajénsia Notisioza Reuters katak rai-nakdoko ne’e akontese besik tuku 07:37 dadeer oras lokál ho profundidade besik kilómetru 35 (21,7 milhas), haktuir hosi USGS. Maibé laiha relatóriu imediatu sira kona-ba mate sira.

Ajénsia sismolojia nasaun nian, Institutu Filipinu Vulkanolojia no Sismolojia nian (Phivolcs), revela katak rai-nakdoko ne’e akontese iha tasi-ibun sira Sidade General Santos nian iha provínsia Sarangani, ponta súl liu hosi illa Mindanao nian.

Phivolcs mós fó sai ona alerta kona-bá tsunami, hodi husu ba ema sira ne’ebé hela iha zona tasi-ibun sira atu evakua.

Laloran Tsunami nian bele to’o metru 1 to’o 3 hosi nível laloran nian iha parte sira Filipina nian, haktuir hosi Sistema Alerta Tsunami nian hosi Estadus Unidus.

Prezidente Filipina nian, Ferdinand Marcos Jr., informa katak nia orienta ona ajénsia governamentál relevante sira hotu atu atua kedas hodi evakua rezidente sira no hahú serbisu salvamentu nian.

“Ba ami nia kompatriota sira iha provínsia sira ne’ebé afetadu, favór ida rona alerta tsunami nian. Muda ba fatin aas liu agora. Lalika hein. Ita-boot nia moris importante liu duké buat hotu ne’ebé husik hela,” Ferdinand Marcos Jr hatete iha komunikadu.

Benjie Ancheta, xefe polísia hosi sidade Alabel, iha Sarangani, iha Filipina, hatete katak edifísiu polísia nian iha afetadu maka’ás s hafoin rai-nakdoko, ne’ebé akontese durante sira nia serimónia hasa’e bandeira.

Ancheta hatete katak laiha relatóriu imediatu sira kona-ba vítima sira, maibé ema balun desmaia hafoin nakdoko maka’ás.

“Ida-ne’e maka rai-nakdoko maka’as liu ne’ebé maka ami hetan,” Ancheta hatete ba Reuters liuhosi telefone.

Avizu kona-bá tsunami fó sai ona ba kosta súl Japaun nian, hosi Prefeitura Ibaraki to’o Prefeitura Okinawa, tuir Ajénsia Meteorolójiku Japaun nian.

Filipina, Indonézia no Japaun situa iha fatin ne’ebé hanaran Ring of Fire, arku ida hosi liña falla sira ne’ebé hale’u Bacia Pasífiku ne’ebé iha tendénsia ba rai-nakdoko no erupsaun vulkánika sira ne’ebé akontese beibeik.

Jornalista: Remigia Locatelli/Editór: Vito Salvadór