Bispu Osório Citora Afonso hosi Dioseze Quelimane Mate Tanba Hetan Tiru

Saudozu Bispu Osório Citora Afonso. Imajen/Dioseze Katólika Quelimane nian

Díli, 8 Juñu 2026 (RAFA.TL),– Servisu Investigasaun Kriminál Nasionál (SERNIC) iha Provínsia Zambézia, Mosambike, konfirma ona, katak Bispu Dioseze Quelimane, Dom Osorio Citora Afonso, mate tanba hetan tiru iha nia rezidénsia ofisiál.

Dom Osorio Citora Afonso, ho tinan 54, mate iha nia rezidénsia hafoin insidente tiruteiu ida iha madrugada Sábadu, 6 Juñu 2026.

Tuir porta-vós SERNIC nian, Maximino Amílcar, númeru indeterminadu hosi asaltante sira tama iha Bispu nia rezidénsia durante oras madrugada sira iha Sábadu dadeer no tiru, hodi kona Bispu Afonso nia kabun.

“Servisu hahú ona prosedimentu investigasaun hodi klarifika kazu ne’e no identifika autór sira,” porta-voz ne’e hateten haensan sirta husi EWTNNEWS.com.

Iha nia parte, Prezidente Konferénsia Episkopál Mosambike nian (CEM), Bispu Inácio Saúre, relata ona katak matebian Bispu Afonso “hetan mate iha sirkunstánsia invulgar sira ne’ebé sei presiza klarifika nafatin.”

“Iha momentu ida-ne’e ne’ebé maka susar tebes, ha’u apela ba serenidade iha fiar no solidariedade fraterna, ho esperansa katak ita sei bele, iha tempu ne’ebé loos, atu fornese informasaun ne’ebé loos no detallu kona-bá eventu triste ida-ne’e,” Ordináriu Lokál hosi Arkidioseze Nampula Mosambike nian hatete iha deklarasaun ida iha loron 6 fulan-Juñu iha ne’ebé nia komunika ba padre no kompañeiru sira.

Iha komunikadu, membru sira hosi Koléjiu Konsultór sira Dioseze Quelimane nian fó sai ho “tristeza no laran-susar maka’as, mate derepente iha uma Aman eternu Bispu Afonso nian, ne’ebé akontese iha dadeer loron 6 fulan-Juñu tinan 2026, iha Uma Episkopál.

Konsultór sira mós fó sai katak Santa Misa dahuluk ba deskansu klamar hosi membru Mosambikanu hosi Institutu Misionáriu sira Consolata nian (IMC) “selebra loron 6 Juñu, tuku 6:00 lokraik, iha Parókia Nossa Senhora da Libertasaun Katedrál Quelimane nian.”

Sira hatete liután katak informasaun adisionál sira kona-bá arranju funeral sira no selebrasaun memoriál sira hosi Bispu matebian ne’ebé hahú nia Ministériu Episkopál iha Janeiru 2024 sei komunika iha tempu ne’ebé loos.

Saudozu Bispu Afonso hetan ordenasaun nu’udar Padre iha fulan Novembru tinan 2002 hafoin remata nia estudu teolójiku iha Semináriu Teolójiku St. Eugene Mazenod iha Arkidioseze Kinshasa iha Repúblika Demokrátika Kongo (RDC).

Nu’udar Padre, nia serbisu iha kapasidade oioin, inklui Vigáriu Parókia no Burseiru Parókia St. Hilaire nian ka Arkidioseze Kinshasa nian, Formadór no Borseiru Semináriu Teolójiku Kinshasa nian, no kolaboradór lokál iha Nunsiatura Apostólika iha RDC, entre servisu saserdotál sira seluk.

Iha tinan 2017, saudozu Bispu Afonso hetan nomeasaun nu’udar funsionáriu iha Dikastériu Evanjelizasaun iha Seksaun ba Evanjelizasaun dahuluk no Igreja Partikulár Foun sira.

Iha Setembru 2023, nia hetan nomeasaun nu’udar Bispu Auxiliár Arkidioseze Katólika Maputo nian no Bispu Konsagradu hosi Luis Antonio Kardeál Tagle iha loron 28 Janeiru 2024.

Saudozu Bispu Afonso hetan nomeasaun nu’udar Ordináriu Lokál Dioseze Katólika Quelimane nian iha fulan-Jullu 2025.

Hahú hosi loron 10 fulan-Abríl, nia hala’o knaar nu’udar Administradór Apostóliku hosi Arkidioseze Beira nian, hafoin demisaun hosi Amu-Bispu Claudio Dalla Zuanna.

Jornalista: João Carlos/Editór: Vito Salvadór