CEO Grupu Empreza ETO Nilton Gusmão Fahe Esperiénsia ho Klubu Estudu Akademiku Fakuldade Ekonomia no Jestaun UNTL

CEO grupu empreza Esperança Timor Oan (ETO), Nilton Telmo Gusmão dos Santos, sia oradór no fahe esperiénsia ho Klubu Estudu Akademiku Fakuldade Ekonomia no Jestaun UNTL iha Liquiça, Sábadu 6 Juñu 2026.

Liquiça, 07 Juñu 2026 (RAFA.TL)– CEO grupu empreza Esperança Timor Oan (ETO), Nilton Telmo Gusmão dos Santos, Sábadu (6/62026), sai oradór xafe   iha atividade Klubu Estudu Akademiku Fakuldade Ekonomia no Jestaun husi Universidade Nasionál Timor Lorosa’e (UNTL).

Notísia Relevante: ETO Selebra “May Day” ho Reflesaun no Halibur Kolaboradór Liu Na’in-500

Atividade akademiku ne’ebé konsentra  iha  Salaun São Brito, Liquiça Vila ne’e, CEO grupu empreza ETO Nilton Telmo Gusmão dos Santos, fahe nia esperiénsia servisu iha mundu negósiu atu fó motivasaun no koñesimentu kona-bá oinsá prepara an  sai empreendedór di’ak iha futuru.

Nilton Gusmão enkoraja estudante sira hodi dehan, susesu iha negósiu presiza iha planu, esperansa ho onestidade,  maibé presiza  esforsu, disiplina,  inovasaun no korajen atu simu dezafiu sira, tanba atu sai  susesu  ba konstrui negosiu iha futuru ne’e la fasil.

“Moris ne’e tenke mai ho planu, se laiha planu ita labele halo buat ida. Iha ha’u nia hanoin kona-ba ativiade ekonómika iha buat tolu de’it maka  tau iha ha’u nia an, mehi, saida mak imi hakarak  mehi de’it, ha’u hakarak  ida ne’e, hakarak ida ne’ebá, hanesan ai-funan halo de’it, maibé tenke iha esperansa dehan katak buat ne’ebé ha’u mehi tenke realiza, fiar bele halo tan ida ne’e, maibé atu to’o iha ne’ebá presiza onestidade,” Nilton Gusmão hateten.

Nia  mós sujere ba Klubu Estudu Akademiku Fakuldade Ekonomia no Jestaun-UNTL, atu kolabora hamutuk ho departamentu sira seluk, nune’e bele alkansa  planu negosiu sira hodi haburas ekonómika nasionál no lori benefísiu di’ak ba povu no sosiedade Timorense.

“Ha’u hakarak imi sira ne’e iha departamentu ekonomia no jestaun, imi tenke sai pilar importante liu iha atividades ekonómika Timor nian. Imi tenke funsiona departamentu sira seluk  hodi realiza sira nia mehi,  imi halo business brand, halo negósiu hamutuk ho departamentu seluk, imi avansu negósiu pequena,” Nilton Gusmão tenik.

Emprezáriu Timoroan  ne’e haktuir iha dalan naruk ne’ebé nia liu,  hahú  husi negósiu ho rekursu limitadu to’o konsege harii empreza ida ne’ebé agora fó servisu ba Timoroan barak iha Timor-Leste.

Grupu empreza ETO iha nia  empreza subsidiáriu  hamutuk 16 mak hanesan ETO Moving, G&S konstrusaun sivíl, GOTA, Santos Living, Detile, D’City Hotel, ETO-TELCO (Rafa no NTV), ETO Gas, VIP Gas, ETO the avitation servise kompany, KTON, ETO E&P, Nine Aparel, Ti-Oan Fintech, Hotel Timor no Supernine.

Iha diskusaun partisipante no estudante sira husu kona-bá estratéjia negósiu, jestaun finanseira, lideransa no dezafiu sira ne’ebé emprezáriu Timoroan enfrenta iha merkadu nasional, Nilton Gusmão hatán hodi dehank perseveransa no vontade atu aprende husi sala mak sai xave prinsipál atu alkansa objetivu.

Iha fatin hnaesan, Koordenadór Klubu Estudu Akademiku FEG-UNTL, Elmezio João Campos de Oliveira Carvalho, konsidera matéria esplikasaun husi CEO grupu empreza ETO ne’e sai hanesan inspirasaun ba jerasaun foun tanba hanesan jerasaun foun ne’ebé sei kontinua Konstrui nasaun ne’e liu husi negósiu ba futuru.

“Ami buka hela inspirador hanesan Sr. Nilton Gusmão, atu nune’e, motiva ami bele fó hanoin oinsá atu ami kontribui ba dezenvolvimentu ekonómia no dezenvolvimentu ba ita nia nasaun nian. Tanba ida ne’w mak ami kovida Sr. Nilton Gusmão hodi mai fahe nia koñesementu relasiona ho asuntu ne’e,” Elmezio João Campos de Oliveira Carvalho hateten.

Luis Camões da Silva, orgullu ho Nilton Gusmão ne’ebe partila ona  esperiénsia  halo negósiu sai inovativu hanesan fó motivasaun diak ba jerasaun sira tuir mai.

“Ita ligadu ba oradór ohin nia esplikasaun nu’udar ema Timoroan ida oinsá iha planu di’ak ida, atu harii nia negoóiu, nia iha objetivu tolu ne’ebé nia tau prinsipal liubá nia negósiu maka mehi, esperansa ho onestidade, iha ne’ebá nia dehan mehi ne’e gratuita presiza esperansa no konfiansa ne’ebé ita hakarak hala’o no ita esforsu. Tanba evolusaun moris ba oin la’ós ba kotuk.” Luis Camões haktuir.

Atividade ne’e remata ho mensajen husi CEO  grupu empreza  ETO, Nilton Telmo Gusmão dos Santos ne’ebé nafatin motiva no enkoraja estudante no juventude Timoroan sira kontinua aprende, aproveita oportunidade edukasaun no la tauk atu hahú projetu inovadór sira ne’ebé bele fó benefísiu ba komunidade no nasaun tomak.

Nilton Gusmão subliña futuru ekonómia Timor-Leste depende mós ba kapasidade juventude sira atu kria negósiu foun no hamosu empregu ba jerasaun tuir mai.

Jornalista: João Carlos/Editór: Vito Salvadór