PM husu Sidadaun Hotu Asiste Kopa Mundiál 2026 ho Responsabilidade

Primeiru-Ministru Kay Rala Xanana Gusmão.

Díli 05 Juñu 2026( RAFA.TL)- Primeiru-Ministru (PM), Kay Rala Xanana Gusmão, husu sidadaun hotu iha liberdade atu apoiu nasaun ne’ebé deit mak sei kompete iha Kopa Mundiál 2026, maibé tenke apoiu ho responsabilidade hodi garante estabilidade iha sosiedade nia let.

Notísia Relevante: Prezidente FFTL Husu Timoroan Hotu Asiste Kopa Mundiál 2026 ho Espíritu Desportivu

Tinan ne’e  jogu  Kopa Mundiál sei  abertura iha Sidade Mexico iha estádiu Arstheca, iha loron 12 fulan-Juñu 2026, no sei remata iha loron 19 Jullu 2026.

Primeiru-Ministru (PM), Kay Rala Xanana Gusmão ba jornalista sira iha Palásiu Prezidensiál, Díli, Sesta (05/06/2026), hatete Kopa Mundiál hanesan Festa Desportivu ida ne’ebé sempre realiza tinan haat dala ida ho nia objetivu prinsipál mak determina ekipa futeból nasionál ne’ebé di’ak liu iha mundu hotu hodi foti títulu nu’udar kampionatu mundiál.

Xefe Governu husu ba sidadaun sira, jogu ida ne’e ema hotu iha liberadade atu gosta nasaun ne’ebé deit mak envolve iha Kopa Mundial.

“Banhira asiste jogu Kopa Mundiál, sidadaun sira iha direitu atu espresa sira nia sentimentu ba nasaun ne’ebé de’it maka sai kampiaun, maibé nafatin garante paz durante jogu ne’e lao,” Xanana Gusmão hateten.

Primeiru-Ministru esplika Timor-Leste hanesan nasaun ne’ebé demokrátiku, ema hotu iha liberdade atu espresa sira nia ksolok iha eventu ida ne’e tanba Kopa Mundiál akontese tinan haat dala ida.

Iha Timor-Leste sidadaun sira bele asiste direita transmisaun jogu sira Kopa Mundiál 2026 nian  liu husi kanál ofisiál TV pré-pago ETO-TELCO (NTV) no RTTL, E.P ne’ebé hetan sub-lisensa husi ETO-TELCO no mos Live Streaming iha Timor Telecom.

Jornalista: Remigia Locatelli/Editór: Vito Salvadór