Sekretária Ezekutiva CPLP ho MNEK Timor-Leste Deskute Preparasaun Reuniaun Konsellu Ministru CPLP

Sekretária Ezekutiva CPLP), Maria de Fátima Jardim, enkontru ho Ministru Negosiu Estranjeiru no Kooperasaun (MNEK), Bendito dos Santos Freitas, Tersa (02/06/2026).

Díli, 03 Juñu 2026 (RAFA.TL)-  Sekretária Ezekutiva Comunidade dos Países de Língua Portuguesa (CPLP), Maria de Fátima Jardim, Tersa (02/06/2026), iha Díli, halo enkontru  ho Ministru Negosiu Estranjeiru no Kooperasaun (MNEK), Bendito dos Santos Freitas,  hodi deskute preparasaun sira kona-bá reuniaun Konsellu Ministru (KM) CPLP ne’ebé sei reliaza iha fulan-Jullu, tinan ne’e, iha Timor-Leste.

Iha okaziaun ekontru preparasaun ne’ebé halao iha edifisiu MNEK, Díli, Tersa (02/06/2026), Sekretaria Ezekutiva CPLP, Maria de Fátima Jardim, parabeniza mós Timor-Leste nia responsabilidade hodi asume mandatu temporal ba iha prezidénsia CPLP durante tinan ida ne’e.

Sekretaria Ezekutiva CPLP nia valiasaun ba Timor-Leste nia mandatu la’ós deit hanesan ezemplár ida, maibé mós hanesan presidénsia ne’ebé bele ultrapasa espetativa no defende objetivu komun sira ne’ebé lori komunidade ne’e no liu-liu Timor-Leste ba futuru ida prosperu.

“Ha’u temi ona katak ida-ne’e la’ós de’it sai ezemplár, maibé ida-ne’e maka prezidénsia ida ne’ebé maka ultrapasa espetativa sira. Tanba ne’e, nu’udar rezultadu husi orientasaun permanente ne’ebé ita hetan, ita hamutuk ba beibeik kona-bá saida mak objetivu ne’ebé ita defende. Tanba ne’e, ita defende objetivu sira ne’ebé bele lori ba komunidade ida-ne’e orgullu fali, hafoin marka tiha pájina sira liberdade nian ba luta ba ukun rasik-an, ita bele marka pájina sira ksolok nian ne’ebé sei grava ho prezidénsia Timor-Leste nian,’’ Sekretaria Ezekutiva CPLP Maria de Fátima Jardim hateten.

Embaixadora ne’e informa katak iha pontu importante husi enkontru ho Ministru Negosiu Estranjeiru no kooperasaun maka koa’alia kona-bá reuniaun konsellu ministru CPLP ne’ebé maka sei akontese iha fulan oin, hodi hahú haré no diskute kona-bá ajenda nasionál sira, ajenda global no mós lema ne’ebé maka Timor-Leste hili ona ba mandatu prezidénsia Timor ninia.

“Iha nível Konsellu Ministru avaliasaun husi matadalan no issu sira ba vizaun estratéjiku tuir mai husi CPLP ba tinan sira oin mai, ne’ebé prevee katak ita-nia ajenda nasionál sira, bele ajusta ba ajenda globál 2030 no ita bele iha CPLP ne’ebé iha jeopolítika no jeoestratéjika  pozisiona privilejiadu iha kontinente hotu-hotu,’’ nia esplika.

Sekretaria Ezekutiva Maria de Fátima Jardim mós hato’o parabéns ba povu Timor-Leste ba rezultadu husi perseveransa, esforsu, hetan ona independénsia, liberdade, no hakmatek ona, atu progresu no kreximentu Timor-Leste nian la’ós de’it ho nasaun sira CPLP  nian maibé mos ba nasaun hotu-hotu iha mundu ne´ebé servisu ba paz no progresu.

Jornalista: Remigua Locatelli/Editór: Vito Salvadór