Ema ho Defisiénsia Sira Kontenti Partisipa iha Festival TT TasiFest 2026

Ema ho difisiénsia hetna espasu VVIP iha festival TT TasiFest 2026 hosi asiste konsertu iha Tasi-Tolu, 29-30 Maiu 2026.

Díli, 01 Juñu 2026 (RAFA.tl)- Ema ho defisiénsia (EhD) ne’ebé asesu ba fatin very very important person (VVIP) sente kontenti tanba partisipa direita iha eventu TT TasiFest 2026 hodi akompaña direta konsertu TT TasiFest iha Tasi-Tolu, Díli, Timor-Leste husi Sesta-Sábadu (29-30/05/2026).

Membru Asosiasaun Defisiénsia Timor-Leste (ADTL), Jezuinho de Araújo, senti kontenti, tanba  partisipa dala-tolu ona iha eventu TasiFest hodi asesu ba fatin ne’ebé mak asesivel hodi asiste eventu imporatante sira hanesan ne’e.

“Ha’u nia rekomendasaun ba iha komisaun eventu TT TasiFest nian karik bele aumenta tán ema ho difiesiensia sira, ne’ebé mak seidauk hetan oprtunidade hanesan ha’u, fó mós oportunidade ba sira hodi partisipa hodi sente saida mak eventu TT TasiFest nian,” Jezuinho de Araújo ba Rafa.tl iha festival TT TasiFest  iha Tasi-Tolu Díli, Sábadu kalan (30/05/2026).

Jezuinho de Araújo hatutan, nia  artista favoritu iha eventu TasiFest 2026 mak artista lendáriu husi  Indonézia Iwan Fals, ne’ebé anima ona no sente kontenti loos mai partisipa TT TasiFest 2026.

Nia mós husu ba komisaun TT TasiFest fahe mós hanesan kartaun ne’ebé sira hetan, iha fatin VVIP nian hakarak mós hatudu no fó ema hotu katak Inkluzaun envolve ema iha fatin ida-ne’e.

Jezuinho de Araújo adianta katak nia sente seguru no flexible iha eventu TT TasiFest 2026 kalan rua hodi bele akompaña no ksolok ho konsertu artista internasionál no nasionál sira.

Iha fatin hanesan Silvia Soares, hanesan ema ho defisiénsia mós epresa nia kontenti tanba  bele partisipa direita  iha  TT TasiFest 2026 hodi bele haré direitamente konsertu iha ne’e.

“Tanba durante ne’e dalabarak ami haré husi televizaun de’it, maibé agradese tanba ami hetan oportunidade iha espasu VVIP, entaun agradese loos tanba bele hetan oportunidade ida-ne’e,” Silvia Soares tenik.

Silvia Soares afirma nia  artisita favoritu iha eventu TasiFest ne’e mak  Iwan Fals, tanba artista ne’ebé famozu gosta tebes nia muzika sira.

“Ba futuru ha’u hanoin katak presiza aumenta nia volume ba iha ema ho defisiénsia tanba ha’u hanoin iha tinan kotuk, no tinan ida-ne’e hanesan, maibé iha tinan oin bele aumenta ema ho difisiénsia ba númeru 50,” nia rekomenda.

Tuir nia, karik iha tinan oin TasiFest ida-ne’e hakarak konvida mós artista sira ne’ebé mak ho feto ne’ebé mak bele partisipa iha eventu ida-ne’e, tanba eventu TastiFest sira tutuir mai ne’e mesak artisita mane de’it.

Jornalista : Zita Menezes/Editór: Vito Salvadór