PM Xanana Kontenti Asiste Performa Iwan Fals

PM Xanana hamutuk ho joven sira asiste konsertu Iwan Fals iha festival TT TasiFest 2026 iha Tasi-tolu, Sesta kalan (29/05/2026). Imajen/Espesiál

Díli, 30 Maiu 2026 (RAFA.tl)- Primeiru-Ministru (PM) Kay Rala Xanana Gusmão hatete, foin primeira-vez partisipa iha eventu TT TasiFest 2026 no kontenti tanba bele asiste direta performa artista no múzikus lendáriu Iwan Fals iha Timor-Leste.

PM Xanana ba Rafa.tl iha Tasi-tolu, Sesta kalan (29/05/2026), iha ámbitu festival TT TasiFest, husu mós ba joven sira atu labele kria problema durante eventu TT TasiFest 2026 la’o to’o remata ho di’ak.

Xanana Gusmão nia partisapasaun iha eventu TasiFest 2026 tanba konvida  direta husi Artista Lendáriu Iwan Fals hafoin hasoru malu iha Palásiu Governu no kontenti tanba haré ema barak liu-liu joven sira.

“Joven sira respeita malu, favor ida labele akontese problema iha eventu TT TasiFest,  karik hemu, hemu oituan hemu hodi hola anin nian. Ha’u mós primeira vez mai, ema hotu koñese Iwan Fals, ne’ebé sai naran boot ida iha Indonézia, ne’ebé ohin ami hasoru malu dehan tenke ba, ha’u dehan di’ak, ha’u tempu iha ha’u ba. Kontenti tanba bele haré, haré katak dalaruma loro-loron ita la’o tristeza, la’o presaun, buat oin-oin tanba servisu laiha, servisu la hetan, mais pelumenus kalan ida mai hamutuk iha ne’e, ita hotu book aan oituan, hasai tiha buat sira ne’e hotu,” Primeiru-Ministru Kay Rala Xanana Gusmão hateten.

Xefe Governu hatutan, eventu TasiFest 2026 ne’e mak to’o fin la akontese buat ida Timor nian naran sei sai boot nafatin, tanba sosiedade rasik mak asegura paz no estabilidade.

“Eventu sira hanesan ne’e, ne’e inisiativa husi sira, saida mak Governu bele ajuda mak, tau seguransa hodi ajuda komunidade para labele baku malu,” Xanana hateten.

Xefe Governu mós hatutan katak nia  prezensa iha eventu TasiFest mós haré iha, pafiliaun barak ne’ebé fa’an produtu Timor nian, no nia rasik mós sempre hemu Kafé Timor Orgániku loro-loron.

Iha Sesta  kalan konsertu iha festival  TT TasiFest 2026 iha Tasi-tolu, Iwan Fals hananu múzika kuaze 10 no husi múzika sira ne’e, Iwan Fals kria rasik múzika espsiál ba Timor-Leste ho titulu, “Malam Turun di Bumi Lorosa’e”.

Tuir observasaun Rafa.tl iha eventu TasiFest 2026 hetan partisipasaun másimu husi joven, ema estranjeiru, VIP, ema ho difisiénsia sira.

Iha eventu TasiFest 2026 hetan seguransa másimu husi Polísia Nasionál Timor-Leste (PNTL) hodi asegura situasaun iha TasiFest la’o ho di’ak to’o konsertu ne’e remata.

Artista sira ne’ebé performance iha eventu TasiFest 2026 iha kalan dahuluk 29 Maiu 2026 mak hanesan, FDJ Jac Inta, Black Jesuz, Galaxy, Iwan Fals & Band no Guy Sebastian.

Jornalista : Zita Menezes/Editór: Vito Salvadór