Segunda Divizaun Liga Timorense, Nagardjo F.C ho As Ponta Leste Impata ho Score 0-0

Adeptu sira husi Nagardjo F.C ho As Ponta Leste asiste sira-nia ekipa favoritu joga iha Estádiu Munisipál Díli, Kuarta (27/05/2026).

Díli, 28 Maiu 2026 (RAFA.tl)- Ekipa Nagarjho F.C no As Ponta Leste obrigadu tenke fahe pontu hanesan hafoin impata ho score 0-0 iha Jogu kontinuasaun segunda divizaun Liga Timorense époka 2026 iha Estádiu Munisipál Díli, Kuarta (27/05/2026).

Ekipa Nagardjo F.C ho As Ponta Leste iha ambisaun atu gaña vitória iha jogu ne’e hodi asegura fatin iha tabela klasifikasaun grupu A Liga Timorense époka 2026, maibé rezultadu iha kampu obriga ekipa rua tenke fahe pontu hanesan no lori fila pontu ida ba sira nia ekipa.

Iha jogu primeira parte ekipa rua lansa kedas kontra atake ba malu liu husi jogu ida lais ho kontra atake ne’ebé iha, maibé laiha golu ruma mak akontese.

Iha minutu 25 ba leten ekipa rua nia intensidade jogu sei nafatin as no halo gurda-rede husi ekipa rua tenke halo ezersisiu maka’ás hodi asegura nia ekipa husi bola ameasa sira. Nagardjo F.C liu husi nia jogador sira iha meiu kampu halo jogu ida rapidu no ho antesipasaun ne’ebé di’ak lansa atake sira tuituir malu ba nia adversáriu As Ponta Leste, maibé la iha golu ida mak akontese.

Ho balansu ne’ebé ekipa Nagardjo F.C ho As Ponta Leste halo iha kampu durante minute 45 nia laran obriga ekipa rua mantein ho score 0-0 molok ba deskansa.

Hakat  ba segunda parte ekipa rua mantein ho estratejia ne’ebé iha maibé hahú halo tranjisaun ba tátika hodi buka oportunidade ba halo golu no iha mós substituisaun ba jogador sira iha kada liña atu bele hasa’e intensidade jogu hodi produs golu.

As Ponta Leste lansa atake dala-rua tuituir malu ba Nagarjho F.C,  maibé ekipa Nagardjo F.C sei mantein halo antesipasaun ida diak no asegura nia guarda-rede husi ameasa ne’ebé iha.

Tama ba minitu 80 ba leten ekipa rua mantein halo jogu ida atrativu tebes liu husi kontra atake sira, maibé nafatin laiha golu ruma mak akontese no rezultadu 0-0 halo ekipa rua tenke fahe pontus hanesan iha jogu ne’e ,hodi kontinua ba jogu seluk iha grupu A Liga Timorense époka 2026.

Tuir orariu, segunda divizaun Liga Timorense époka 2026, sabadu (30/05/2026), ekipa As Ponta Leste sei konta Field F.C no Hibers Díli F.C sei kontra Academica F.C.

Jornalista: Marito da Costa/Editór: Vito Salvadór