Lei Kriminaliza Difamasaun Atu Kontrola Pesoál Ne’ebé Halo Akuzasaun Falsu iha Mídia Sosiál

Ministru Interiór, Francisco da Costa Guterres.

Díli, 27 Maiu 2026 (RAFA.tl)- Ministru Interiór (MI), Francisco da Costa Guterres, informa lei kriminaliza difamasaun ne’ebé sei mai atu kontrola individuu sira ne’ebé halo akuzasaun falsu ba ema nia personal juridiku ka naran di’ak iha média sosiál sein iha faktu.

“Lei kriminaliza difamasaun Parlamentu Nasionál propoin atu halo took diskusaun ne’e la’o halo nusa, mais lei ne’e loloos mai atu kriminaliza de’it, maibé lei ne’e mós mai para atu fó hanoin ba ita. Sé ita kuandu atu halo akuzasaun ba ema ruma, ita tenke iha faktu mak halo akuzasaun ba ema ruma, dalaruma ita tuur-tuur haré ema ne’e ita la gosta ona, ita hatama iha mídia sosiál, ita akuza ema sein baze, sein iha evidénsia ruma,” Ministru Interior Francisco da Costa informa ba jornalista sira iha Edifisiu Ministériu Finansa, Díli, Kuarta (27/05/2026).

Ministru Interiór ne’e hatutan, baibain  públiku mós haré ba postajen iha média sosiál sira  akuza ema no públiku halai tuir, katak  ema ne’e  mak sala, mais loloos ema ne’e la sala ida, tanba ne’e mak  presiza lei kriminaliza difamasaun.

“Bele iha país demokratikú, mais mak ne’e importante liu mak ita ho evidénsia forte, dehan ita-boot involve iha kazu ida-ne’e, ami iha evidénsia hanesan ne’e di’ak liu para ita hatudu ba ema loos duni ita-boot halo sala. Ita dehan ita-boot halo sala, maibé la hatudu faktu, ne’e ita estraga tiha ema nia naran di’ak, lei ne’e ha’u hanoin ba individual,” nia tenik.

Nia afirma kona-bá  produtu  jornalista ne’e hanoin  jornalizmu iha kode étika ketak, jornalizmu  ne’e kérdizer nia halo servisu bazeia ba kode étika no iha lei komunikasaun sosiál ne’ebé proteje hela produtu jornalistiku  sira no tuir nia haré durante ne’e jornalista sira  halo servisu di’ak hela.  Katak lei kriminaliza difamasuan ne’e la prezudika jornalista sira-nia servisu.

Jornalista : Zita Menezes/Editór: Vito Salvadór