Kopa AFTL 2026, São Francisco Xavier F.C Halakon Santa Cruz F.C Ho Score 4-1

Ekipa São Francisco Xavier F.C. Imajen/AFTL

Díli, 26 Maiu 2026 (Rafa.tl)- Ekipa São Francisco F.C Xavier susesu halakon nia adversáriu Santa Cruz F.C ho score fantastiku 4-1 iha jogu dahuluk grupu B Kopa Asosiasaun Futsal Timor Leste (AFTL) 2026 ne’ebé mak realiza iha kampu Futsal Kuartel Jenerál FALINTIL-Forsa Defeza Timor-Leste (F-FDTL) iha Díli,  Tersa (26/05/2026).

Iha jogu primera parte ekipa rua hatudu jogu furak iha kampu hodi atrai adeptu Hadomi Futsal sira ne’ebé asiste direta jogu refere. Maibé, ekipa São Francisco Xavier F.C ne’ebé mak hatudu ritmu jogu di’ak konsege domina liu bola hodi aproveita lansa sutu sira ba rede Santa Cruz F.C maibé seidauk bele rezulta golu.

Atake ne’ebé halo hosi São Francisco Xavier F.C ikus mai fó rezultadu pozitivu iha minutu 16, hafoin jogador David Correia aproveita bola barullu iha área grandeal hodi marka golu ba rede Santa Cruz F.C hodi muda score ba 1-0.

Ho golu ne’e, halo ekipa São Francisco Xavier kontinua organizadu di’ak iha liña ofensiva, hodi kontrola ritmu jogu no kria oportunidade liuhosi movimentasaun ne’ebé lais, no mantein domina bola, to’o termina jogu priemeiru parte score 1-0.

Kontinua ba segunda parte ekipa São Francisco Xavier F.C, kontinua ritmu jogu ne’ebé mak aas hodi halo presaun, ho nune’e,  jogu foin halao minutu ida São Francisco Xavier FC marka tan golu ida liu hosi jogador Zenio Sousa hodi aumenta score ba 2-0.

Ekipa São Francisco Xavier F.C fiar aan liután hodi lansa kontra atake ba ekipa Santa Cruz F.C no konsege lansa tan golu rua tui-tuir malu liu hosi jogador Adronaldo Martis iha minutu 25 no Sercandio Barbosa iha minutu 26 hodi haboot liu tan score sa’i 4-0.

Liu deit minutu rua ekipa Santa Cruz F.C konsege responde golu ida liu hosi jogador Domingos Reis hodi muda hamihis score ba 4-1.

Ho golu ne’e motiva liután espiritu jogador sira hosi ekipa Santa Cruz F.C hodi lansa kontra atake ba São Francisco Xavier F.C, maibé to’o termina jogu segunda parte score mantein 4-1 vitória ba São Francisco Xavier F.C.

Ho rezulatadu ne’e hatuur ekipa São Francisco Xavier F.C iha pozisaun dahuluk grupu (B) ho pontu tolu, enkuantu ekipa Santa Cruz F.C iha pozisaun ikus liu ho pontu zero (0).

Group (B) kompostu hosi ekipa tolu mak hanesan São Francisco Xavier F.C, Santa Cruz F.C, no Becuse United F.C.

Jornalista: Davilio Valdamei/Editór: Vito Salvadór