APC Fó Formasaun Ba Kolaboradór Empreza Grupu ETO Kona-bá Prevensaun no Kombate Inséndiu

APC fó formasaun no kapasitasaun ba kolaborador Empreza Grupu Esperança Timor Oan (ETO) kona-bá prevensaun no kombate inséndiu, inklui primeiru sokorru báziku, Segunda (25/05/2026).

Díli, 25 Maiu 2026 (RAFA.tl)- Sekretária Estadu Protesaun Sivíl (SEPS), liu husi Autoridade Protesaun Sivíl (APC), fó formasaun no kapasitasaun ba kolaboradór Empreza Grupu Esperança Timor Oan (ETO) kona-bá prevensaun no kombate inséndiu, inklui primeiru sokorru báziku, liuliu  ba sira ne’ebé servisu iha área  downstream.

Formasaun no treinamentu husi APC ba kolaboradór empreza Grupu ETO sira ne’e  hala’o durante loron-rua, hahú husi loron 25 to’o loron 26 fulan-Maiu, tinan ne’e, ne’ebé foku ba matéria sira prevensaun kontra inséndiu no oinsá asegura ka salva vida iha serbisu sira downstream nian.

Formadór husi APC, Urbano Venansio Belo ba Rafa.tl iha Edifísiu Torreto, Mandarin, Segunda (25/05/2026), hatete formasaun ne’e hala’o hanesan  rekizitu ida husi Autoridade Nasional Petróleu ba estasaun kombustivel hotu iha teritóriu nasionál, oinsá atu bele enfrenta amesa sira husi inséndiu.

Nia informa sei fó materia kona-bá kontra inséndiu no mós rekizitu ida husi  ANP no APC mós sei husu ba postu kombustível hotu ne’ebé estabelese iha Timor laran tenke iha dever no obrigasaun tuir hotu formasaun tanba haré katak postu kombustível ne’e sai ameasa boot ida bainhira karik akontese inséndiu.

“Ita fó ba sira, ita fó iha pratika, hanorin ba sira oinsá atu utiliza instinger ne’e rasik, depois hanorin ba sira klase ahi atu sira bele komprende hodi utiliza, kada tipu de sentor ne’e iha diferente no ida-idak iha nia klase ahi  ne’ebé sira bele utiliza tuir matéria ne’ebé mak ami hanorin ba sira,” Urbano Belo hateten.

Kona-bá primeiru sokorru báziku ne’e karik iha asidente ruma, ema kanek no ema ruma monu, balu monu iis laiha oinsá sira bele fo iis, sira bele ajuda transporta, oinsá sira bele komonika  ba parte emerjénsia, liuliu ahi han karik oinsá sira komunika ba parte bombeiru no mós ba ambulánsia hodi atende.

Iha formasaun ne’e, formadór sira mós sei halo simulasaun atu nune’e formandu sira  bele komprende oinsá atu uza sasan ba prevensaun inséndiu.

Iha fatin hanesan Maneger Downstream Empreza Grupu Esperansa Alberto Soares Aniceto husu ba formandu sira atu aproveita formasaun ne’e ho diak hodi aplika bainhira akontese asidente ruma.

“Husu ba alin sira, aproveita formasaun ida-ne’e tanba imi servisu iha área ida ne’ebé mak risku, imi hasoru liu asidente, kuandu buat ruma imi mak hasoru direta, entaun ho formasaun ida-ne’e, bele kapasita imi nia aan, para nune’e, akontese buat imi labele hakfodak, no buat ida imi aprende ne’e la’ós deit aplika iha servisu fatin, maibé mos bele aplika iha uma ka fatin seluk bainhira hetan asidente,” Alberto Soares Aniceto hateten.

Alberto Soares Aniceto hatutan dalabarak akontese asidente iha fatin públiku ema halo vídeo deit, mas tuir lolos bele fo primeiru sukoru ba ema ne’ebe hetan asidente ne’e, tanba ne’e buat ne’ebé aprende iha ne’e bele aplika fali ba moris rasik hodi tulun no salva ema seluk.

Iha observasaun direita Rafa.tl  nota katak formasaun ne’e kompleta kedas entre teoria no prátika iha ne’ebé hafoin simu formasaun formandu sira akompaña husi formadór sira halo kedas pratika ka simulasaun iha áreador edifísiu Torreto.

Jornalista: Marito da Costa/Editór: Vito Salvadór