Kanadá Sei Investe Millaun 15 USD Ba Projetu Enerjia Solar Fotovoltaiku iha Timor-Leste

Embaixadór Kanadá la’ós rezidente, Jess Dutton akompaña hosi delegasaun empreza hosi Kanadá hetan entrevista hosi jornalista sira hafoin hasoru malu ho PM Xanana iha Palásiu Governu, KInta (21/05/2026).

Díli, 21 Maiu 2026 (RAFA.tl)- Embaixadór Kanadá la’ós rezidente, Jess Dutton akompaña hosi delegasaun empreza hosi Kanadá hanesan BlackBerry, hasoru malu ho Primeiru-Ministru Kay Rala Xanana Gusmão, iha Palasiu Governu, Kinta (21/05/2026), hodi hato’o sira nia interese no planu atu investe investe millaun 15 USD ba Projetu Enerjia Solar Fotovoltaiku iha Timor-Leste.

Embaixadór Jess Dutton hateten  Timor-Leste tama ona iha ASEAN, empreza Kanadá nian lubuk ida iha interese atu dezenvolve oportunidade komersiál sira iha parseria ho povu Timor-Leste.

“Ha’u informa ba Primeiru-Ministru kona-bá investimentu Kanadá nian ho montante millaun 15 USD bá projetu enerjia solár fotovoltaiku. Entaun ida-ne’e konversa ida ne’ebé produtivu tebes, no ha’u hanoin katak ami iha ideia lubuk ida kona-bá kolaborasaun ba oin. Entaun durante ami iha ne’e, ami hasoru malu ona ho Ministru Petróleu no Minerais, ami hasoru malu ho Ministru Komérsiu, no klaru ho Kámara Komérsiu sira,” Embaixador Kanadá Jess Dutton informa.

Embaixadór Jess Dutton hatutan Kanadá iha kapasidade atu halo investimentu iha Timor-Leste liu-liu iha petróleu, gás no projetu solar PV ne’ebé daudaun ne’e Timor-Leste mós hala’o hela kooperasaun ho Japaun.

Iha sorumutu ne’e, Primeiru-Ministru hato‘o manesajen pozitivu tebtebes ba inisiativa Kanadá nian ne’ebé lori empreza sira ne’e mai hodi esplora liu-tán área prioridade sira ne’ebé aliña ho prioridade Governu nian.

Relasaun bilaterál entre Kanadá ho Timor-Leste di‘ak tebes no nakonu ho kooperasaun iha area oioin, hanesan dezenvolvimentu, seguransa, governasaun di‘ak no edukasaun.

Relasaun diplomátika ofisiál entre nasaun rua ne’e hahú iha Maiu 2002, depois independénsia Timor-Leste nian. Kanadá administra nia relasaun ho Timor-Leste liu-hosi Embaixada Kanadá nian iha Jakarta, Indonézia.

Entre tinan 1999 to’o 2010, Kanadá partisipa iha misaun ONU nian iha Timor-Leste hodi ajuda hametin estabilidade no páz. Militár no Polísia Timor-oan sira mós simu treinamentu apoiadu hosi Kanadá.

Jornalista: João Carlos/Editór: Vito Salvadór