Governu Timor-Leste ho Woodside Kontinua Reforsa Kooperasaun Ba Projetu TLNG no Greater Sunrise

Vise-Prezidente Ezekutiva Woodside Energy, Ltd, Julie Fallon halo enkontru ho Primeiru-Ministru (PM), Kay Rala Xanana Gusmão iha Gabinete Fronteira Marítima, Palásiu Governu, Segunda 18 Maiu 2026.

Díli, 19 Maiu 2026 (RAFA.TL)- Governu Timor-Leste ho Woodside  kontinua reforsa kooperasaun kona-bá progresu implementasaun akordu kooperasaun ba projetu Timor-Leste Liquefied Natural Gas (TLNG) no gazodotu ho dezenvolvimentu kampu Greater Sunrise.

Iha sorumutu entre Vise-Prezidente Ezekutiva Woodside Energy, Ltd, Julie Fallon no Primeiru-Ministru (PM), Kay Rala Xanana Gusmão ne’ebé hala’o iha Gabinete Fronteira Marítima, Palásiu Governu, Segunda (18/05/2026), parte rua iha diskusaun ida ne’ebé nakonu ho amizade  no atualiza mós kona-bá progresu akordu kolaborasaun ne’ebé halo iha fim tinan kotuk ne’ebé asina entre Woodside ho Ministériu Petróleu no Rekursu Minerais (MPRM).

“Objetivu prinsipál maka atu aprezenta Señor Paul Sullivan, ne’ebé maka Vise-Prezidente Senior Woodside nian ba Greater Sunrise. Entaun, ha’u iha oportunidade atu aprezenta Señor Sullivan ba Sua Exelénsia Primeiru-Ministru, no ami diskute progresu foin lalais ne’e iha Greater Sunrise dezde asinatura akordu kooperasaun nian iha tinan kotuk nia rohan.  Primeiru-Ministru ko’alia ho ami kona-bá importánsia atu progresu Greater Sunrise iha tempu ne’ebé loos,” Vise-Prezidente Ezekutiva Woodside Energy, Ltd, Julie Fallon informa.

Vise-Prezidente Ezekutivu Woodsite ne’e hatutan, kooperasaun entre ekipa tekniku woodside energy ho Ministériu Petróleu Timor-Leste la’o di’ak no iha ona progresu pozitivu no parte hotu demostra kompromisu atu fó rezultadu no konkluzaun ida ne’ebe lalais liu.

“Servisu la’o di’ak entre ekipa tékniku Woodside nian no pesoál tékniku Ministériu Petróleu nian. Ha’u fiar, konkursu sira ne’ebé dezenvolve hela ba levantamentu sira no hanesan ne’ebé presiza atu halo.  Kona-bá negosiasaun sira tuir tratadu sira fronteira marítima nian, entaun sira-ne’e la’o ho di’ak no parte hotu-hotu hakarak atu koko no lori sira-ne’e ba konkluzaun ida lalais liután,” Julie Fallon hateten.

Woodside konfirma katak opsaun dezenvolvimentu LNG  bele sai viável inklui projetu Timor-LNG iha kosta sul Timor-Leste no dezenvolvimentu iha Darwin, aleinde ne’e Jullie Fallon reafirma presiza Governu rua ne’e nia servisu hamutuk atu determina dalan ne’ebé di’ak liu hodi aselera progresu iha “Reuniaun Trilateral” sira tuir mai hodi nune’e bele hatudu rezultadu pozitivu  ba projetu Greater Sunrise.

Iha tinan 2025, Governu liu-hosi reuniaun estraordinária Konsellu Ministru (KM), delibera hodi fó poder tomak bá Ministru Petróleu no Rekursu Minerál (MPRM), Francisco da Costa Monteiro atu lori Governu nia naran, asina akordu kooperasaun ho Woodside Energy, Ltd ba projetu TLNG  no gazodotu no dezenvolvimentu kampu Greater Sunrise.

Akordu ida-ne’e aliña ho Governu nia esforsu estratéjiku sira atu valoriza rekursu naturál nasionál nian, tuir Planu Estratéjiku Dezenvolvimentu (PED) 2011-2030 nian, no hatudu pasu importante ida ba avaliasaun téknika, komersiál, no regulatória konjunta kona-bá futuru unidade LNG ida, iha territóriu Timor-Leste.  Negosiasaun sira ne’ebé hala’o hosi MPRM ho Woodside Energy, ne’ebé na’in ba parte hosi kampu Greater Sunrise nian.

Ho desizaun ida-ne’e, Governu avansa iha prosesu implementasaun ba vizaun ida-ne’ebé buka atu reforsa industrializasaun enerjétika nasionál, promove diversifikasaun ekonómika, no garante katak benefísiu hosi rekursu Greater Sunrise nian sei kontribui direta ba dezenvolvimentu nasionál.

Jornalista: Marito da Costa/Editór: Vito Salvadór