Tenente Jenerál Falur Rate Laek Ameasa Demite Membru F-FDTL Ne’ebé Suspita Ba Kazu Omisídiu iha Aldeia Poros

Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”. Imajen/Rafa.tl

Díli, 11 Maiu 2026 (RAFA.TL)- Xefe Estadu Maiór Jenerál Falintil-Forsa Defesa Timor-Leste (F-FDTL), Tenente Jenerál Domingos Raul Falur Rate  Laek, seidauk simu relatóriu ofisiál kona-bá envolvimentu membru F-FDTL  ida iha kazu omisídiu iha Aldeia Poros, Suku Mehara, Postu-Administrativu Tutuala, Munisípiu  Lautem, Sábadu, 09 Maiu 2026.

Notísia Relevante: PNTL Detein Joven Na’in-10 Suspeita Kazu Omisídiu iha Aldeia Poros

Tenente Jenerál Falur Rate Laek sei demite membru F-FDTL refere bainhira iha prova forte katak nia envolve iha asaun krime ne’ebé rezulta to’o sidadaun Vicencio de Jesus Fernandes lakon vida no Reinaldo Rivaldo Lopez hetan kanek.

“Ha’u seidauk simu relatóriu ofisiál, ne’ebé imi husu iha Polísia kazu ne’e oinsá ona, nia militar okupadu ka militar kriminozu ne’e, justisa mak sei kondena, ha’u rona asegura tiha ona kriminozu sira, ha’u fo parabéns ba Polísia, tanba kuandu krime la to’o oras 24 sira to’o atende ona,” hatete Xefe Estadu Maior Jenerál F-FDTL, Tenente Jenerál Domingos Raul Falur Rate  Laek ba jornalista sira iha Rezidénsia eis Primeiru-Ministru Taur Matan Ruak, Farol, Díli, Segunda (11/05/2026).

Tenente Jenerál Falur Rate Laek hatutan, medida ne’e regra iha ona, halo tuir prosesu justisa ne’ebé oinsá halo nia prosesu administrativa. Tanba ne’e sei hein relatóriu husi komandante unidade no Komponente molok halo desizaun tuir lei ne’ebé vigora no regra instituisaun F-FDTL nian.

“Bainhira iha investigasaun membru ne’e komete duni sei hasai depois ba Tribunál mak simu ninia pena,” Falur Rate Laek afirma.

Polísia Nasionál Timor-Leste (PNTL), liu husi Polísia Eskuadra Tutuala detein joven na’in-10 inklui membru Falintil-Forsa Defeza Timor-Leste (F-FDTL), ne’ebé deskonfia envolve iha kazu konfrontu ida to’o sidadaun ida ho naran Vicencio de Jesus Fernandes lakon vida tanba hetan agresaun fizika.

Suspeitu na’in-10 ne’ebé deskonfia envolve iha kazu ne’e ho naran inisiál hanesan LRH, GDSB, MDS, NF, MB, AF, RF, MG, IDC, no LP.

Jornalista: João Carlos/Editór: Vito Salvadór