Timor-Leste Lansa Eventu Importante Tolu Ba Tinan 2026

Díli, 09 Maiu 2026 (RAFA.TL)- Prezidénsia Repúblika  kolaborasaun ho IX Governu Konstitusionál, Sábadu (09/05/2026), ofisialmente lansa eventu estratéjiku tolu ba tinan 2026 ne’ebé kompostu husi Maratona Internasionál Díli, Simeira Siénsia ba Dezenvolvimentu no “Natal do Povo”.

Inisiativa sira-ne’e refleta vizaun estratéjiku nasaun nian hodi hametin envolvimentu internasionál, promove dezenvolvimentu inkluzivu, no konsolida unidade nasionál.

Lansamentu ne’e marka inísiu husi esforsu nasionál ne’ebé koordenadu hodi koloka Timor-Leste nu’udar plataforma ba kolaborasaun globál, inovasaun, no interkámbiu kulturál.

Maratona Internasionál Díli 2026

Harii iha tinan 2010 ho patrosíniu husi Prezidente José Ramos-Horta. Maratona Internasionál Díli, promove saúde, bem-estar, no turizmu hodi halibur partisipante lokál no internasionál sira iha selebrasaun desportu no reziliénsia.

Maratona 2026, ho tema “Hadomi Ita-nia Ai-laran no Balada Fuik sira”, sei hala’o iha loron 8 fulan-Agostu tinan 2026, no hein katak sei atrai partisipante liu 7,000, inklui atleta internasionál sira, korredór amadór sira, no membru komunidade sira iha kategoria korrida oioin.

Hanesan eventu desportivu prinsipál ida iha nasaun, Maratona ne’e promove turizmu, vizibilidade internasionál, no envolvimentu komunidade nian, no mós promove konsiensia ambiental no prátika sustentável.

Programa ne’e hahú ho Korrida Selesaun Nasionál iha loron 09 fulan-Maiu tinan 2026, iha Dili, hodi atrai partisipasaun públiku dezde inisiu.

Jantar Gala ida ho patrosinadór no parseiru sira  sei hala’o iha loron 07 fulan-Agostu tinan 2026, iha Palásiu Nobre-Lahane, hodi fó oportunidade ida atu hametin parseria sira no rekoñese kontribuisaun sira.

Komplementa Maratona, DIM EXPO 2026 sei hala’o iha loron 06 to’o loron 8 fulan Agostu tinan 2026, iha Palásiu Prezidensiál Nicolau Lobato. Festivál kulturál no ambientál loron-tolu ne’e expande eventu ne’e ba selebrasaun nasionál loron barak, kombina desportu ho kultura, partisipasaun juventude, no sustentabilidade. Expo sei destaka identidade Timor-oan nian, promove inisiativa ekonomia verde, no envolve parseiru rejionál no internasionál sira iha área sira hanesan konservasaun biodiversidade, inovasaun, no interkámbiu kulturál.

 Simeira Siénsia ba Dezenvolvimentu 2026

Simeira Siénsia ba Dezenvolvimentu 2026 sei hala’o iha loron 24–25 fulan-Agostu 2026, iha Sentru Konvensaun Díli (CCD, sigla portugés), reunidu liu 25 laureadu Prémiu Nobel, hamutuk ho siensista sira, polítiku sira, no inovador sira ne’ebé koñesidu iha mundu.

Simeira ne’e sei sai hanesan plataforma altu nivel aas ba diálogu kona-ba siénsia, teknolojia, no inovasaun iha servisu dezenvolvimentu sustentável, hodi koloka Timor-Leste nu’udar sentru emerjente ida ba interkámbiu koñesimentu globál.

Jantar Gala ba laureadu sira no bainaka espesiál sira sei hala’o iha loron 23 fulan-Agostu tinan 2026, iha Palásiu Nobre-Lahane, hodi oferese oportunidade ida ba interasaun altu nivel no envolvimentu diplomátiku.

Expo Siénsia no Teknolojia sei hala’o paralelu ho Simeira, hodi fornese plataforma ida ba akadémiku sira, estudante sira, emprezariál sira, inovadór sira no patrosinadór sira atu aprezenta peskiza, teknolojia, no solusaun sira ne’ebé relevante ba Timor-Leste nia dezenvolvimentu. Expo sei promove kolaborasaun, troka koñesimentu, no parseria entre peritu internasionál sira no parte interesada lokál sira.

Hafoin Simeira ne’e, partisipante sira sei hola parte iha vizita terrenu ne’ebé organizadu iha Timor-Leste iha loron 26 fulan-Agostu 2026, inklui programa sira ne’ebé foka ba biodiversidade no konservasaun tasi nian iha Illa Ataúro, no mós agrikultura iha foho, produsaun kafé, no meius subsisténsia rurál iha Aileu no Munisípiu Maubisse. Vizita sira ne’e ho objetivu atu liga diálogu sientífiku ba realidade lokál no prátika dezenvolvimentu sustentável.

Segmentu envolvimentu rejionál sei hala’o iha loron 27 fulan-agostu tinan 2026, inklui vizita sira ba Indonézia, hodi hametin liután kooperasaun internasionál no parseria rejionál sira.

Natal do Povo 2026

“Natal do Povo” mak selebrasaun ida-ne’ebé halibur komunidade oioin iha nasaun ho espíritu unidade no solidariedade durante tempu Natál.

“Natal do Povo” hahú ho abertura ba Espozisaun Prezépiu hodi hamoris fila fali tradisaun Natál ne’ebé apresiada iha nasaun. Espozisaun Prezépiu, tradisaun ne’ebe metin ona iha fiar sarani kristaun nian, nu’udar espresaun profunda kona-ba espiritualidade, kreatividade, no espíritu komunitáriu. Timor-Leste nian.

Tuir mai, Prezidénsia fahe prezente Natál ba komunidade sira iha munisipiu laran tomak, inklui labarik, faluk, ema ho nesesidade espesiál, pasiente iha Ospitál Nasionál Guido Valadares, prizioneiru, orfanatu no komunidade sira ne’ebé kbi’it laek.

“Natal do Povo” sai nu’udar testemuña ba kompromisu Prezidénsia no Governu nian hodi promove unidade nasionál, selebra kultura Timor-Leste nian, no fahe bensaun sira Natál nian diretamente ho sidadaun sira ne’ebé sira serbí.

Eventu estratéjiku tolu ba tinan 2026 reprezenta esforsu unifikadu ida husi Prezidénsia no Governu atu hasa’e perfil internasionál Timor-Leste nian enkuantu fó benefísiu konkretu ba nia populasaun. Sira konstitui plataforma ida ba envolvimentu ho parseiru internasionál sira, misaun diplomátika sira, organizasaun dezenvolvimentu sira, no setór privadu, kontribui simultaneamente ba prioridade dezenvolvimentu nasionál sira ba tempu naruk.

Hamutuk, Maratona Internasionál Díli, Simeira Siénsia ba Dezenvolvimentu, no Natal do Povo forma kalendáriu úniku ida ne’ebé hatudu Timor-Leste ba mundu iha selebrasaun ba pás, umanidade, desportu, no kultura. Maratona personifika ita-nia espíritu reziliénsia, unidade no protesaun ba ita-nia biodiversidade ne’ebé furak; Simeira Siénsia nian lori hanoin brillante sira mai ita-nia rain hodi fó inspirasaun ba ita-nia foin-sa’e sira, haburas inovasaun, no loke dalan ba kresimentu; no Natal do Povo reprezenta espíritu verdadeiru husi ita-nia nasaun—tempu ida atu fó, fahe, no halibur hamutuk nu’udar família ida de’it, hodi garante katak ksolok époka nian to’o ba iha ita-nia komunidade sira no moris iha ema Timor-oan sira hotu nia fuan.

Prezidénsia Repúblika no IX Governu Konstitusionál konvida parseiru internasionál sira, patrosinadór sira, no parte interesada sira seluk atu partisipa no fó apoiu ba eventu estratéjiku tolu ba tinan 2026. Inisiativa sira-ne’e oferese oportunidade úniku ida atu kolabora ho nasaun ida ne’ebé dezenvolve lalais, kontribui ba prioridade nasionál sira ho impaktu boot, no partisipa iha tinan ida-ne’ebé ho vizibilidade no kooperasaun internasionál.

Jornalista: Elio dos Santos/Editór: Vito Salvadór