Reitór UNTL La Tolera Dosente “Orienta” Estudante iha Uma no Karreta Laran

Reitór UNTL, Joviano António da Costa aprezenta aan ba Prezidente Repúblika, José Ramos-Horta, Tersa 06 Maiu 2026

Díli 06 Maiu 2026 (RAFA.TL)- Reitór Atuál Universidade Nasionál Timor Lorosa’e (UNTL), Joviano António da Costa, afirma iha nia mandatu sei la tolera dosente orientadór sira atu “orienta” estudante iha uma no karreta laran, hodi evita aktu asédiu seksuál ne’ebé akontese tanba ida ne’e kontra lei no afeta ba dignidade ema nian no kredebilidade instituisaun nian.

Reitór Joviano António da Costa hato’o deklarasaun ne’e ba públiku bainhira  hamutuk ho Vise-Reitór no mós Reitór Asuntu estudantil aprezenta an ba Xefe Estadu iha Palásiu Prezidensiál, Kuarta (06/05/2026). Reitór Joviano António da Costa hatete, asédiu seksuál ne’ebé akontese antes seidauk asume knaar hanesan Reitór, nia akompaña no rekoñese katak ida ne’e akontese duni iha Universidade, no konsidera asaun ne’e la di’ak no sei la tolera ida ne’e akontese fila-fali iha UNTL.

“Ha’u Reitór la konkorda ida ne’e, situasan sira ne’e dez-ordem no husu para labele mosu tan, ema sira ne’ebé komete asaun sira ne’e, ida ne’e maka ha’u nia pozisaun,” Reitór UNTL Joviano António da Costa afirma.

Reitór UNTL períodu 2026 to’o 2031 ne’e hatutan, durante mandatu tinan lima iha Universidade Nasionál Timor-Lorosa’e sei la autoriza pesoal ruma atu komete tan aktu ida ne’e iha Universidade.

Ba pesoal sira ne’ebé maka antes ne’e komete aktu ida ne’e, buat hotu bazeia ba regra no regulamentu tenke kumpri tuir lei ne’ebé vigora, ho nune’e nia parte mós kontinua nota hela aktu sira ne’ebé maka antes ne’e akontese iha Reitór anteriór nia mandatu no sei hadi’a atu la akontese tan.

Ba asaun ka asédiu seksuál ne’ebé maka pesoal ne’e halo tenke ba hatán tuir lei, ne’ebé presiza duni pesoal ne’e ba kumpri pena iha prizaun tenke kumpri, maibé seidauk to’o iha ne’ebá labele obriga atu kontra lei bei-beik hodi hetan pena.

Reitór ne’e afirma, iha nia mandatu mós sei la tolera profesor orientadór sira atu orienta tan estudante sira, bainhira oras aprendijazem remata ona, para no kontinua fali tuir oras no iha aula ka fatin própriu universidade nian, tanba dalaruma asédiu mos bele akontese liu husi asaun sira ne’e.

‘’La iha autorizasaun ida dehan orienta iha uma, eskola la’os iha uma, iha uma ne’e la’ós fatin bimbing, ha’u Reitór ne’e ha’u la autoriza para atu bimbing iha kareta laran iha eskola, iha fatin, iha kantor la’os ba Estrada,’’ Reitór Joviano subliña.

Reitór ne’e mós informa katak, kazu asédiu seksuál ne’ebé maka akontese iha Universidade Nasionál Timor-Lorosa’e ne’ebé antes ne’e komete husi Dosente inisiál MBF ne’ebé maka prátika ba alegadu asédiu seksual hasoru estudante ativu no la ativu balu husi departamentu Polítika Públika, Fakuldade Siénsia Sosiais iha Universidade Nasionál Timor-Lorosa’e rezolve tiha ona tuir lei ne’ebé vigora.

Jornalista : Remígia Locatelli/Editór: Vito Salvadór