Governu ho Kompañia Joint Venture Kontinua Deskute Planu Estratéjiku Dada Pipeline Greater Sunrise Mai TL

Imajen/Dok.MPRM

Díli, 29 Abril 2026, (Rafa.tl)- Governu Timor-Leste kontinua hametin kooperasaun ho kompañia joint venture sira ba projetu Greater Sunrise hodi deskute planu estratéjiku  dada kadoras (pipeline) mai Timor-Leste.

Ministru Petróleu no Rekursus Minerais (MPRM), Francisco da Costa Monteiro, ba jornalista sira iha Otél Palm Spring, Díli, Kuata (29/04/2026), hateten Govenru kontinua hametin kooperasaun ho kompañia joint venture sira no iha Woodside ne’ebé mós hanesan operadór ba kampu Greater Sunrise nian iha upstream hamutuk ho TIMOR GAP, E.P no Osaka Gas haré estrajia sira ba kadoras mai Timor-Leste.

“Agora ita lori parte sira ne’e hotu mai hamutuk iha ne’e hodi bele deskute ho detallu no  indentifika saida mak nesesáriu hodi bele servisu hamutuk ba objetivu ida  tuir Timor-Leste nia hakarak katak  lori kadoras Greater Sunrise mai Timor-Leste,” Ministru Francisco da Costa Monteiro infrorma.

Governante ne’e esplika prosesu estudu la’o di’ak hela, iha elementu ida importante agora atu indentifikasaun tan pontu balun ne’ebé nesesáriu atu halo hamutuk no kona-bá Liquefied Natural Gas (LNG), Refinaria, petrokimikas ne’e buat ketak ida, no sei inklui ho estudu hotu ne’ebé iha.

Ministru Petróleu subliña diskusaun sira iha workshop ne’e sei lori atu hotu-hotu bele hola parte iha downstream nian.

Iha fatin hanesan, General Manager for Development empreza Woodside, David Reid, hareten Governu nia apoiu ba akordu sira TLNG importante no bele hafasil kadoras dada mai Timor-Leste.

“Ministru nia apoia ba akordu kooperasaun ba TLNG ne’e importante  ba Greater Sunrise iha ne’ebé bele serbisu hamutuk ba akordu kooperasaun TLNG ne’e no joint venture sunrise serbisu hamutuk atu asegura konseitu ba dezenvolvimentu TLNG ne’e,” David Reid hateten.

Prezidenti TIMOR GAP, E.P,  Rui Maria Alves Soares hatete TIMOR GAP hola parte hanesan parseiru upstream, hamutuk ho Woodside ho Osaka Gas.

“Ami agora hamutuk halo workshop ho ekipa downstream nian, tanba akordu ida entre Ministériu Petróleu hamutuk ho Woodside, TCA, ne’ebé foka ba iha dezenvolvimentu pipeline ho TLNG ne’ebé atu harii iha Natarbora,” Rui Maria Alves Soares esplika.

Husi Workshop ne’e sei provínsia  bainhira mak finaliza, maibé tempu badak tenke finaliza para depois hakat ba faze tuir mai hodi halo implementasaun hodi bele ba to’o iha buat ne’ebé bolu naran FID (Final Investment Decision).

Rui Maria Alves Soares hatutan negosiasaun la’o di’ak hela, dokumentu rua ne’e mak ida bolu naran PSC (Production Sharing Contract), ida seluk bolu naran Fiscal Regime/Fiscal Framework. Ne’e sei finaliza hamutuk iha tempu badak,  labele pronunsia agora, maibé iha tempu badak.

Jornalista: João Carlos/Editór: Vito Salvadór