PN Autoriza Vizita Estadu Prezidente Repúblika Ba Papua Nova Guiné

PN autoriza dezlokasaun Prezidente Repúblika, José Ramos-Horta, hodi hala’o vizita estadu ba Papua Nove Guné. Imajen/PN

Díli, 28 Abríl 2026 (RAFA.tl)–Parlamentu Nasionál, liu husi reuniaun plenária ordinária, Tersa  (28/04/2026), autoriza dezlokasaun Prezidente Repúblika, José Ramos-Horta, hodi hala’o vizita estadu ba Papua Nove Guné, entre loron 11 no loron 14 fulan-Maiu 2026.

Desizaun plenária PN ne’e liuhusi diskusaun no votasaun h onia rezultadu  votu a-favor 36, kontra 0 no abstensaun ida (1).

Deslokasaun ho natureza ofisiál ida-ne’e hodi partisipa iha Cimeira do Oceano Melanésio, ne’ebé realiza iha Port Moresby, Papua Nova Guiné, entre loron 11 no loron 13 fulan-Maiu tinan 2026.

Komunikadu ofisiál ne’ebé Rafa.tl asesa haktuir vizita ida-ne’e realiza tanba hetan konvite husi onorável James Marape, GCL, MP, Primeiru-Ministru Papua Nova Guiné nian.

Iha mós vizita privada ba Darwin-Austrália, entre loron 13 no  loron 15 fulan-Maiu tinan 2026, hodi partisipa iha serimonia atribuisaun grau doutor letra (honoris causa), husi Charles Darwin University, ne’ebé previstu iha loron 14 fulan-Maiu tinan 2026, iha kampus Casuarina-Darwin. Vizita ida-ne’e bazeia ba konvite husi Reitora Interina no Prezidente Charles Darwin University, Professora Fiona Coulson.

Iha períodu antes Ordem do Dia, Komisaun Finansas Públika (komisaun C), reprezenta husi Vise-Prezidente Komisaun Deputadu Francisco da Costa “Ikulay”, no relatora, Deputada Aliança da Conceição Araújo, apresenta relatóriu no pareser husi vizita fiskalizasaun ba munisipiu rua mak hanesan Munisípiu Manatuto no Rejiaun Administrativa Espesiál Oé-Cusse Ambeno (RAEOA).

Hafoin kontinua ba deklarasaun polítika husi Bankada Parlamentar sira hanesan FRETILIN, no PLP, nune mós Deputadu sira kontinua aprezenta problema sira iha área saúde, edukasaun, infraestrutura bázika, seguransa alimentár no problema sosiál sira seluk ne’ebé presiza atensaun husi Governu no instituisaun relevante sira.

Sesaun Plenária ne’e, prezidi husi Prezidente Parlamentu Nasionál, Maria Fernanda Lay, akompaña husi membru meza sira, no hetan prezensa husi Sekretaria Estadu Igualdade, Elvina de Sousa Carvalho, reprezenta Vise-Ministru Asuntu Parlamentár.

Jornalista: Remigia Locatelli/Editór: Vito Salvadór