PM Xanana Esplika Tranzisaun iha RAEOA Atu Hadi’a Sistema Administrativu no Halo Mudansa Ba Povu Oé-cusse

PM Xanana Gusmão

Díli, 23 Abril 2026 (RAFA.tl)- Primeiru-Ministru Kay Rala Xanana Gusmão, liu husi enkontru semanal ho Prezidente Repúblika José Ramos-Horta, iha Palásiu Prezidensiál, Kinta (23/04/2026) hatete, razaun Governu halo tranzisaun iha rejiaun Administrativu Espesiál Oé-cusse Ambeno (RAEOA), atu hadi’a sistema administrativu no halo mudansa hodi prepara tama iha programa desentralizasaun.

Notísia Relevante: Governu Nomeia Hikas Régio da Cruz Ba Prezidente RAEOA no Ezonera Diretór Jerál Rejionál no Diretór Rejionál

Primeiru Ministru, Kay Rala Xanana Gusmão hateten kona-bá Re-estrutura ba RAEOA tanba prosesu desentralizasaun ne’ebé Governu planeia la’o hela no hakarak iha governasaun lokál hodi haré kada Munisípiu iha área ne’ebé mak sira presiza, kurize no área ne’ebé mak presiza hametin hodi sira bele prepara aan atu sai Governu lokál, tanba Governu lokál la’ós atu simu de’it kargu, maibé sira atu simu servisu ona nu’udár Governu no mós sei iha eleisaun iha asembleia Munisipál.

“Maibé hateke fali ba iha Oé-cusse sei atraza liu, atraza liu tanba tinan 10-resin iha ne’ebá Prezidente Autoridade mak deside hotu, buat ida la to’o ba kraik, iha kraik ita husu la hatene tanba iha ne’ebá ne’e desizaun ema ida nian de’it,” Primeiru-Ministru Kay Rala Xanana Gusmão hateten.

Xefe Governu esplika, sistema finanseiru mós la la’o tuir regra ne’ebé estabelese iha Timor tomak, ho ida ne’e, mak kleur ona la ba iha ne’ebá tanba sira hili no haruka Ministru sira ba  tama iha programa desentralizasaun hodi haré katak prepara didi’ak iha ema kompetente atu kaer área hotu-hotu ne’ebé tenke funsiona iha ne’ebá.

“Ha’u informa ba Prezidente Repúblika katak depois halo tiha tranzisaun iha ne’ebá ne’e estrutura ne’ebé ami nomeia tranzitóriu hotu. Tranzitóriu ne’e katak la permanente no la dura hotu, horseik, ezonera hotu fali no ohin Ministru Adsministrasaun Estatál  iha  Oé-cusse atu fó posse ba estrutura foun, Prezidente mak kontinua, Régio da Cruz, Sekretáriu Rejionais, Diretór, no servisu hotu-hotu halo mudansa,” Xanana informa.

Primeiru-Ministru subliña, iha rezolusaun ne’e hatete katak mandatu ba tinan ida, Governu sei akompaña nafatin,  fulan rua ba tolu haré ba la dezempeña didi’ak, signifika la hatene servisu ida ne’e no lakoi ne’e hasai tau fali seluk, tanba iha ne’ebá hanesan mós Timor laran tomak, iha ne’ebá Oé-Cusse oan de’it mak sei kaer distinu povu no rejiaun ne’ebá nian.

Jornalista: Elio dos Santos/Editór: Vito Salvadór