Governu Altera Rejime Dívida Públika

Edifisiu Ministériu Finansas. Imajen/Espesiál

Díli, 22 Abril 2026 (RAFA.tl)- Governu liu husi Reuniaun Konsellu Ministru iha Palásiu Governu, Díli, Kuarta (22/04/2026), aprova projetu proposta Lei, ne’ebé aprezenta hosi Ministra Finansas, Santina José Rodrigues F. Viegas Cardoso, alterasaun dahuluk ba Lei nú. 13/2011, loron 28 fulan-Setembru, kona-bá Rejime Dívida Públika.

Iha komunikadu ofisiál ne’ebé Rafa.tl asesa hatete, proposta ne’e permite habelar tan ámbitu emisaun dívida públika nian, hodi la limita de’it ba finansiamentu infraestrutura estratéjika sira, atu nune’e bele permite uza instrumentu hanesan títulu tezouru hodi finansia despeza jerál Estadu nian.

Alterasaun ida-ne’e ho objetivu atu aliña rejime dívida públika nasionál ho prátika sira ne’ebé adota ona iha maioria nasaun sira no kria kondisaun ba jestaun finansas públikas ida ne’ebé sustentável liu iha médiu no longu prazu.

Ho inisiativa ida-ne’e, Governu hanoin atu hametin sustentabilidade orsamentál, prepara nasaun ba diminuisaun progresiva reseita husi Fundu Mina-rai, no mós garante estabilidade boot-liu iha finansiamentu polítika públika ne’ebé esensiál.

Projetu Proposta Lei ida-ne’e hetan ona deliberasaun iha sorumutu Konsellu Ministru loron 27 fulan-Janeiru tinan 2026. Maibé, tuir ajustamentu ne’ebé introdús iha faze redasaun finál, liu-liu atu klarifika regras ne’ebé relasiona ho emisaun no jestaun Títulus no Letras Tezouru, presiza reavaliasaun no deliberasaun foun ba Projetu Proposta Lei ida-ne’e.

Jornalista: Elio dos Santos/Editór: Vito Salvadór