EBC Santu António Baucau Reprezenta Timor-Leste Partisipa Kompetisaun Internasionál Siénsia no Matemátika Iha Kambodia

Estudante na’in-neen (6) husi EBC Katólika Santu António Baucau reprezenta Timor-Leste partisipa iha kompetisaun Prémiu Internasionál ba Kreatividade no Inovasaun 2026 iha Siénsia no Matemátika iha Kambodia. Imajen/Espesiál

Díli, 22 Abril 2026, (RAFA.tl) —Estudante na’in-neen (6) husi eskola Ensinu Báziku Sentrál (EBC, sigla portugés) Katólika Santu António Baucau, reprezenta Timor-Leste partisipa iha  kompetisaun Prémiu Internasionál ba Kreatividade no Inovasaun 2026 iha Siénsia no Matemátika iha Kambodia.

Estudante EBC Santu António Baucau nian na’in-neen (6) ne’e, Kuarta (22/04/2026), aranka ona ba Kambodia. Sira mak hanesan;  Florbella Ezania da Silva, Angel Grace Costa de La Rosa, Felia Nisa da Costa, Silviana Cardoso Carlos, Florzinha Evander Correa da Silva ho Leonardo Ricardo da Costa.

Estudante na’in-neen husi Munisípiu Baucau reprezenta Timor-Leste iha kompetisaun Prémiu Internasionál ba Kreatividade no Inovasaun (International Creativity and Innovation Award) 2026  durante loron tolu, hahú husi loron 24 to’o loron 26 fulan-Abril tinan 2026.

Iha seremónia despedida ne’ebé hala’o iha Baucau, foin lalais ne’e, Sekretáriu Ezekutivu UNESCO iha Timor-Leste, Luís Nino de Fátima Soares hatete, kada tinan UNESCO organiza eventu loron mundiál siénsia no matemátika ba estudante sira no kuaze grupu estudante atus-resin mak partisipa ona  Kompetisaun ba Prémiu Internasionál ba Kreatividade no Inovasaun iha siénsia no matemátika.

“UNESCO nia avaliasaun difine katak, sira iha ona talentu sira no fiar aan no domina ona sira nia matéria sira durante kompetisaun iha loron mundiál siénsia nian, ami hakarak atu hakle’an sira-nia koñesimentu, fiar aan nafatin ko’alia públiku (public speaking) iha Kambodia. Atu manán ka la manán, la problema naran katak iha nafatin vontade espíritu ba kompete nian,” Luís Nino de Fátima Soares hatete.

Biban ne’e, Prezidente Autoridade Munisípiu Baucau, Veneranda Lemos Martins husu ba estudante sira ne’ebé selesiona ona atu estuda maka’ás no lee barak, hodi ba partisipa kompetisiaun nível internasionál ne’e ho di’ak atu lori Timor nia naran ba mundu.

“Imi na’in-neen presiza lee barak  no estuda nafatin atu fila-fali  husi Kambodia lori siénsia, lori buat di’ak ruma ba imi nia aan no transmite ba imi nia kolega sira seluk,” Veneranda Lemos Martins hatete.

Reprezentante Estudante ne’ebé selesionadu hola parte iha Kompetisaun Internasionál iha Kambodia ne’e,  Angel Grace Costa de La Rosa, promete katak ho  konfiansa ne’ebé hetan sei tane ho responsabilidade no kontribui rezultadu ne’ebé di’ak, no lori fila esperiénsia foun.

 Jornalista: Remígia Locatelli/Editór: Vito Salvadór