Komandante Jerál PNTL “Duni” Jornalista Sira, Komisária-Asistente Natércia Husu Deskulpa

Membmru PNTL sira prepara atu simu tomada de posse nu'udár Komandante Polísia munisípiu no adjuntu komandante munisípiu iha Kuartel Jerál PNTL, Segunda 20 Abril 2026.

Díli, 20 Abril 2026 (RAFA.tl)– Komandante Jerál Polísia Nasionál Timor-Leste (PNTL),   Komisáriu-Asistente Afonso dos Santos, Segunda (20/04/2026), la-autoriza (duni) jornalista sira halo kobertura ba seremónia tomada de posse ba Kargu Komandante no Segundu Komandante  Munisípiu sira ne’ebé hala’o iha salaun Kuartel Jerál  PNTL.

Tuir ajenda ne’ebé jornalista destakadu sira iha komandu jerál PNTL simu husi pesoál relasaun públiku PNTL nian  liuhusi WhatsApp konvida jornalista sira atu halo kobertura ba  ajenda serimónia tomada de posse kargu komandante no segundu komandante munisípiu sira ne’e  hahú iha tuku 10:00 Otl. Nune’e jornalista sira ba hlao kobertura, maibé bainhira Komandante-Jerál no Segundu Komandate Jerál  PNTL to’o iha fatin tomada de posse, jornalista sira foti tiha vídeo no foto, Komandante Jerál PNTL Afonso dos Santos lia tún ba dehan, hotu ona imi (jornalista-red) sai.

“Jornalista ba kotuk ne’ebá, iha ne’e reuniaun, hotu ona imi sai,” Komisáriu-Asistente Polísia Afonso dos Santos hateten.

Pratika baibain iha iha Kertal Jerál PNTL  ba kualker serimónia, inklui serimónia  tomada de posse ne’e jornalista sira livre asesa, hodi foti imajen no video hahú husi inísu serimónia to’o ensera.

Hafoin seremónia tomada de posse ne’e, Segundu Komandante Jerál PNTL, Komisária-Asistente Natércia Eufrásia Soares Martins, tun husi andár leten (fatin serimónia nian) mai hakbesik ba jornalista sira hodi dada-lia no husu deskulpa ba jornalista sira, tanba ne’e fallansu ida ne’ebé sira nia parte halo, nune’e sei hadi’a fila-fali iha eventu ne’ebé mak bele foti no labele foti hodi transmite mudansa tuir orden komandu hodi Públiku bele hatene.

“Husi ami nia parte, ami husu deskulpa ba imi, tanba ami nia mídia halo ona konvite ofisiál, maibe realidade iha laran ne’e la hanesan, fallansu ida ne’ebé mak ami nia parte halo, ami sei haré fila-fali ba iha oin ne’e nia protokolu ne’e la’o oinsá, iha eventu ne’ebé mak bele kobre no labele kobre, nune’e bele hadi’a fila-fali. Nune’e bele transmite mudansa tuir orden komandu nian ba públiku atu ema bele hatene,” Komisária-Asistente Natércia Eufrásia Soares Martins hateten.

Komisária Asistente Natércia Eufrásia Soares husu nafatin ba jornalista sira atu hatudu nafatin profisionalizmu nu’udár jornalista hodi publika informasaun sira ho justu.

“Ida ne’e idak-idak ninia karakter, ne’ebé ita tenke komprende tanba dala-barak iha entrevista sira parte terseira sira edita fali vídeo, buat sira ne’e, maibé tuir ha’u nia interpretasaun dalaruma ne’e diskrimina ka lae, maibé ha’u hanoin imi  (jornalista) komprende buat sira ne’e, maibé ha’u husu nafatin imi nia profisionalizmu, nu’udár jornalista nafatin publika ida ne’ebé mak justifika,” Natércia hateten.

 Jornalista: Elio dos Santos/Editór: Vito Salvadór