Kazu Osan Falsu, Tribunál Aplika Medida Koasaun Prizaun Preventiva Ba Arguidu Sira

Arguidu sira ba kumpre prizaun preventiva hafoin audénsia primeira interogatóriu iha TJPID, Sábadu 18 Abríl 2026.

Díli, 18 Abríl 2026, (RAFA.tl)–   Tribunál Judisiál Primeira Instánsia Díli (TJPID) liu husi Juiza prosesu Ana Paula Fonseca, hatun despaixu hodi aplika medida koasaun prizaun preventiva ba arguidu na’in-tolu ne’ebé deskonfia envolve iha kazu osan falsu ho montante dólar amerikanu millaun haat (4)-resin.

Notísia Relevante: Xanana Fó Sai Suspeitu Lori Osan Falsu Ba Kompras iha Centro Supermerkadu

Iha audénsia interogatóriu dahuluk iha Tribunál Judisiál Primeira Instánsia Díli, Sábadu (18/04/2026),  Juiza Ana Paula Fonseca aprova faktu sira ne’ebé aprezenta husi Ministériu Públiku kona-bá kazu osan  falsu US$100.00 hamutuk  dólar amerikanu millaun  haat-resin  ne’ebé   komete husi arguidu na’in-tolu ho naran   inisiál  WYF, JT  no  WY.

Arguidu na’in-tolu nu’udar sidadaun estranjeiru ho nasionalidade Xina  hetan kapturasaun husi ekipa Diresaun Servisu Investigasaun Kriminál (DSIK)-Polísia Nasionál Timor-Leste (PNTL) iha ámbitu buska no apreensaun iha armajen Y&W iha área Bidau tanba hetan osan falsu ho montante dólar amerikanu millaun haat-resin,  iha loron 15 fulan-Abríl tinan 2026.

Arguidu na’in-tolu ne’ebé Tribunál aplika medida koasaun prizaun preventiva ne’e hala’o knaar  iha kompañia Y&W nu’udar Diretora Ezekutiva, Manejer ho xefe armajen.

Iha audénsia primeira interogatóriu ne’e, Ministériu Públiku husu ba Tribunál  atu aplika prizaun preventiva tanba  arguidu na’in-tolu sidadaun estranjeiru. Maibé, defeza sira ne’ebé fó asisténsia legál (advogadu privadu) Pedro Camões, husu ba  Tribunál  atu aplika koasaun médida patrimonial.

Prokuradór  Domingos Goveia Leite  ne’ebé reprezenta Ministériu Públiku alega arguidu na’in-tolu ho  krime rua mak   hanesan  krime falsifikasaun ba dokumentu ka anotasaun téknika ne’ebé previstu iha artigu 303  Kódigu Penál Timor-Leste  no krime kontrafasaun moeda  previstu  iha  artigu 307  Kódigu Penál Timor-Leste.

Advogadu privadu  Pedro Camões, ne’ebé jornalista sira konfirma hafoin desizaun Tribunál nian ba nia kliente na’in-tolu (arguidu) ne’e  informa katak sira nia parte iha prazu loron-30 nia laran  atu halo rekursu kontra desizaun Tribunál Judisiál Primeira Instánsia Díli tanba konsidera desizaun ne’e  la adekuadu ba  nia kliente na’in-tolu.

“Bainhira ami simu ona dokumentu, maka iha prazu loron 30 nia laran, ami halo rekursu kontra desizaun Tribunál ba ami nia kliente na’in-tolu,” Pedro Camões hateten.

Tuir Pedro Camões nia entendimentu katak iha kazu ne’e Tribunál bele fó  desizaun ne’ebé tuir lei haruka, labele foti  médida ida tanba de’it razaun ema ne’e mai husi rai-li’ur .

Nia fundamenta,  justisa ne’ebé lós liu maka ne’e, kuandu osan falsu ida ne’e sirkula ka lae, infelizmente dokumentu hotu-hotu polísia  foti ona iha armajen  tanba  Polísia iha faze preventiva  hodi osan falsu ne’e la sirkula iha merkadu.

Pedro Camões konsiente katak iha duni  osan falsu, maibé osan sira ne’e la uza ba nesesidade merkadoria nian, mas atu uza ba interese animasaun. Tanba ne’e,  Pedro Camões afirma desizaun Tribunál la adekuadu.

Hanesan fó sai ona katak Polísia Nasionál Timor-Leste (PNTL) liu husi Diresaun Servisu  Investigasaun Kriminál  (DSIK) ezekuta mandadu buska husi Ministériu Públiku (MP) ba armajen Y&W iha Bidau, Díli, ne’ebé  deskobre duni prova sira  osan falsu ho montante dólar amerikanu millaun haat (4)-resin .

Armajen Y&W ne’ebé DSIK buska no halo apreensaun ne’e lokaliza iha Aldeia Sagrada Família, Suku Bidau Santana, Postu Administrativu Cristo Rei, Munisípiu Díli no detein suspeitu sira hodi submete ba prosesu identifikasaun no investigasaun.

Jornalista: João Carlos/Editór: Vito Salvadór