Xanana-Horta Aprésia Serbisu PNTL Deteta Osan Falsu Millaun US$4-Resin

Osan dollar amérikanu falsu.

Díli, 16 Abríl 2026 (RAFA.tl)- Primeiru-Ministru, Kay Rala Xanana Gusmão ho Prezidente Repúblika, José Ramos-Horta, aprésia ho serbisu  Polisía Nasionál Timor-Leste (PNTL) liu husi Diresaun Servisu Investigasaun Kriminál (DSIK), ne’ebé halo buska no apreensaun ba armajen Y&W  iha área Bidau Santana no hetan osan falsu ho montante millaun US$4-resin.

Notísia Relevante: Polísia Halo Buska Ba Armajen Y&W Hetan Osan Falsu Millaun Haat-Resin

Primeiru-Ministru Kay Rala Xanana Gusmão iha Kuarta ne’e, hafoin reuniaun Konsellu Ministru, ba kedas Kuartel Jerál Polisía Nasionál Timor-Leste (PNTL) hodi haré no rona rasik  relatóriu breve kona-bá moeda falsu US$100.00 hamutuk millaun US$4-resin.

Ba jornalista sira iha Palásiu Prezidentesiál, Kinta (16/04/2026), Xefe Ezekutivu Timor-Leste ne’e informa  tuir ema ida ba iha loja Centro iha Praia dos Coqueiros sosa sasan no iha loja haré katak  osan falsu, ne’e mak loja ne’e dehan ba Banku Sentrál no Polisía ho Ministériu Públiku sira.

Xanana haktuir CCTV haré hela ema ne’e sai-tama iha nia karreta ne’ebé sira ba to’o uma iha Bindau ne’ebá ho orden atu investiga hodi halo asaun loke armajen.

“Ema sira ne’e (suspeitu-red)  na’in-haat lori hotu ona ba Polisía tama ba konta hela osan ne’e hamutuk millaun US$4-resin mas seidauk hatene lolos maibé Polísia sei halo  relatoriu. Ha’u informa ba Prezidente Repúblika dehan favor fó hatene ba ita nia instituisaun sira tau kedas nia iha kadeia ona, labele 72 oras fila ona buat sira ne’e, mais ida ne’e mak problema boot no Prezidente husu mai ha’u atu fó hatene ba públiku aprésia tebes asaun ne’ebé ita-nia Polisía ho instituisaun sira seluk hala’o,”  Xanana Gusmão haktuir.

Xefe Governu hatutan agora investigasaun mak tenke metin no kle’an hodi bele hatene buat ne’e mai ho saida, haré katak buat ne’e US$20,000.00 karik  kala tau bolsu ona, maibé millaun US$4-resin iha kada kaixa sira, signifika katak buat ne’e boot tebes mai husi ne’ebé.

Xanana hateten  se mai husi Tibar entaun iha Tibar tenke responsabiliza tanbasá mak imi husik buat sira ne’e liu mai los, katak presiza investiga no Xanana  dehan nia rasik ba ona Tibar haré buat ne’e kapas tama no sai, saida de’it mak mak iha kontentór nia laran bele haré mós, maibe deskonfia  ema selu osan ne’e mak  husik liu.

“Polisía serbisu di’ak ho Ministériu Públiku kapas maibé tenke atua mós hasoru nia tama husi ne’ebé, husi Aviaun labele tanba barak tebes ne’e so husi ró mai Tibar lae husi rai, ne’e mak investigasaun tenke la’o nafatin hodi ita hapara problema osan falsu ne’e,” Xanana afirma.

Hafoin autoridade seguransa Polísia halo tiha buska no apreensaun ne’e  lori kedas evidénsia  ka prova osan falsu no asegura sidadaun Xinés na’in-tolu no  sidadaun Indonéziu na’in- ida hanesan traballador ba loja Y&W  hodi submete ba indentifikasaun no investigasaun iha edifisiu Diresaun Servisu Investigasaun Kriminál Kuartel Jerál PNTL.

Atuasaun Polísia nian ne’e ho baze delegasaun kompeténsia husi Ministériu Públiku (MP) ho NUK: 0138/26-PNSIC.

Jornalista:  Elio dos Santos/Editór: Vito Salvadór