Tribunál Hasai Despaixu Apreensaun Veíkulu sira FFTL Tanba Estrutura Ezekutivu Anteriór Laselu Dívida Billete Aviaun Dezde 2021-2024

Buss FFTL nian ne'ebé Polísia halo apreensaun tanba dividas ho ajensia viajen dezde 2021-2024.

Díli, 14 Abríl 2026 (RAFA.tl)- Tribunál Judisial Primera Instansia Díli (TJPD),  hatun despaixu ho NUC 0010/24.CVTDD, hodi halo apreensaun ba bens hanesan veíkulu sira Federasaun Futebol Timor-Leste (FFTL) tanba estrutura ezekutivu anteriór ne’ebé lidera husi Francisco Martins da Costa Jeronimo laselu  dívida billete aviaun ba COFI agency dezde 2021-2024.

Iha despaixu TJPD ne’e hateten autór ka rekerete mak COFI Agency ne’ebé reprezenta husi Carolina M. S no Réu ka requerido mak Francisco Martins da Costa Jeronimo, prezidente ezekutivu FFTL anteriór.

Notifikasaun no ezekusaun despaixu apreensaun nian, tuir artigu 712 no. 1 husi CPC.

Iha notifikasaun ne’ebé ezekuta husi Diresaun Servisu Investigasaun Kriminál (DSIK) Polísia Nasionál Timor-Leste (PNTL) ne’e, husu atu halo apreensaun ba veíkulu sira rua, Mini Bus, ho xapa matríkula A 23-567 TL no autocarro (Bus) ho xapa matríkula 59-240 TL.

Tuir observasaun Rafa.tl  iha ámbitu apreensaun ba veíkulu FFTL nian ne’e nota katak DSIK to’o iha edifísiu FFTL hale’u tuku 15:35 Otl, aprezenta kedas karta  notifikasaun husi TJPD ba parte FFTL molok halo apreensaun ba Mini Bus no Autocarro ne’ebé iha hodi lori ba asegura iha Polísia Nasionál Timor-Leste (PNTL) Munisípiu Díli.

Hafoin ezekusaun ba notifikasaun no apreensaun husi TJPD, Adjuntu Sekretáriu-jerál FFTL, Fernando Baptista Xavier hateten, autpridade polísia halo apreensaun ba veíkulu rua ne’e tanba estrutura ezekutivu FFTL  anteriór la selu dívida billete aviaun  ba COFI Agency nian dezde 2021 too 2024.

“Ida ne’e liga ho kazu dividas ne’ebe mak FFTL nia  estrutura  ezekutivu anteriór sira kompete  iha 2021, 2022 to’o 2024, dividas sira halo ajénsia billete,  tamba ne’e mak estrutura anteriór la rezolve to’o ohin loron, iha ona desizaun Tribunál mandadu de ezekusaun hodi halo apreensaun ba Buss FFTL nian. Iha mandadu ezekusaun Tribunál  ne’e iha Buss ho Mini Bus,” Fernando Baptista Xavier informa.

Iha karta notifikasaun no despaixu ne’ebé Rafa.tl asesu kontempla katak apreensaun sei kontinua tuituir malu to’o hetan montante ne’ebé sufisiente atu satisfás montante sira ne’ebé reklama.

Bens hirak ne’ebé autpridade Polísia halo apreensaun ne’e sei bele entrega hikas ba FFTL bainhira kumpri ona dever sira tuir desizaun ne’ebé tribunál hatun.

Reportajen ekipa Rafa.tl