Portál Ofisiál Ministériu Justisa Hetan “Hack”

Portal ofisiál ka webside Ministériu Justisa nian hetan "hack" ka atake informatika. Imajen/Repro

Díli, 14 Abríl 2026 (RAFA.tl)- Ministru Justisa (MJ), Sérgio de Jesus Fernandes da Costa Hornai, informa  portál ofisial (webside) Ministériu Justisa hetan  “hack” ka atake informatika iha loron 14 fulan-Abril 2026 no halo disturbasaun ba servisu dijitál ministériu nian.

Ministru Justisa, Sérgio de Jesus Fernandes da Costa Hornai ba jornalista sira iha Ministériu Justisa, Díli,  Tersa (14/04/2026), konfirma ho ateke sistema informátiku ne’e halo pájina ofisiál Ministériu nian muda (Mosu) temporariamente ba pájina jogu online.

“Dadersan ne’e ha’u rona hanesan ne’e, ha’u orienta kedas para halo investigasaun ba iha ne’ebá, tanba iha mós asesu ba iha ami nia sitiu ka webside iha problema uitoan, entaun ida ne’e ha’u fó kedan instrusaun ba iha Diretór Nasionál Informatika bele haré took tanbasaida ne’e akontese,” Ministru Sérgio Hornai hateten.

Nia hatutan ekipa halo hela ezersisiu ba ida ne’ebá, bele deskobre depois sei halo medid  tanba la halo admisaun no la admite kualker saida de’it para bele mai estraga fali sistema sira ne’ebé dezenvolve hela.

Ministériu esforsu teknikamente liu husi diresaun Nasionál no Diretór sira teknolojia informatika Ministeriu Justisa nian, halo investigasaun no dilijensia ida para hatene kona-bá situasaun refere. Tamba Problema Informatika ida ne’e afeta ba servisu Ministeriu Justisa nian atu halo publikasaun servisu ministeriu nian.

“Problema ida ne’e bele intrompe ba website Ministériu Justisa nian ne’ebe halo anunsiu, publikasaun,  ba Jornal da República sira ne’ebé bele tau iha ne’ebá para publiku bele asesu,”  nia tenik.

Sérgio Hornai subliña  sei halo kordenasaun ho Ministériu Transporte no Komunikasaun hodi haré ida ne’e, bainhira iha nesesariu ba iha PCIC para bele dezenvolve hetan informasaun detailu.

Jornalista: João Carlos/Editór: Vito Salvadór