PNTL Rejista Timoroan 200-Resin Vítima Ba Jogu Online SnapBoost

Tipu jogu onlie Snapboost. Imajen/Repro.Google

Díli, 14 Abríl 2026 (RAFA.tl)- Porta-voz Komandu Jerál Polísia Nasionál Timor-Leste (PNTL), Superintendente Xefe João Belo dos Reis, informa PNTL rejista Timoroan hamutuk 200-resin sai vítima ba atividade online SnapBoost, ne’ebé hanesan eskema bosok iha forma “game investment” ne’ebé obriga kliente halo depózitu osan maibé la fó retornu.

Porta-voz Komandu Jerál PNTL, Superintendente Xefe João Belo dos Reis, liu husi konferénsia imprensa iha Komandu Jerál PNTL, Díli, Tersa (14/04/2026), husu ba públiku katak Diresaun Servisu Investigasaun Kriminal monitoriza hela atividade sira ne’e, depois mai mós simu ona keixa husi vítima na’in-rua ne’ebé sente ofendidu ba kazu ne’e.

“Agora ita buka hela maluk sira seluk ne’ebé sente ofendidu lakon sira nia osan ba asaun ida ne’e,” Superintendente Xefe Polísia João Belo dos Reis informa.

Polísia Diresaun Servisu Investigasaun Kriminal hetan ona lista ba vítima sira hamutuk 200-resin ne’ebé ema lohi sira hodi hatama osan husi US$20.00 to’o US$200.00 husi konta bankáriu no balun hatama direta ba ema balun para atu halo investimentu.

Porta-voz PNTL aproveita oportunidade ida ne’e hodi fó apela ba públiku liu-liu Inan-Aman sira hotu iha Munisípiu no Postu, Suku no Aldeia sira katak labele fiar arbiru publikasaun ka informasaun husi ema ruma relasiona ho investimentu osan ne’ebe laiha baze legál.

PNTL  sei kontaktu  ho Banku Sentrál Timor-Leste (BCTL) tanba sira mak regulariza atividade negósiu relasaun ho banku ninian, depois Polísia Nasionál Timor-leste sei buka referénsia ba nasaun seluk ne’ebé uza métodu hanesan, para bele justifika prosesu investigasaun ba eskema ida ne’e atu bele hetan autór sira.

Jornalista: João Carlos/Editór: Vito Salvadór