Aero Díli Enfrenta “Insidente” Bird Strike Bainhira Take-Off iha Aeroportu Díli

Aviaun Aero Díli A320 enfrenta "insidente" bird strike iha Aeroportu Internasionál Prezidente Nicolau Lobato, Sesta (10/04/2026).

Díli, 10 Abríl 2026 (RAFA.tl) – Aviaun Aero Díli A319  enfrenta “asidente ki’ik” ka bird strike bainhira take-off ka faze dezlokasaun husi Aeroportu Internasionál Prezidente Nicolau Lobato, Comoro, Díli, atu ba Denpasar-Bali, Indonézia.

Notísia Relevante: Aero Díli Suspende Provisória Voo Ba Singapura ho Fuzhou-Xina

 “Insidente ki’ik” ne’e akontese iha entre tuku 09:00 Otl, bainhira aviaun iha kondisaun take-off roll ka faze ida iha ne’ebé aviaun hahú aselera nia atinji velosidade ida (v-speed) hodi hasa’e aviaun nia inus no semo maka manu ida semo kona aviaun (bird strike).

 Bird strike maka insidente kolizaun entre aviaun ida ho manu ka animál fuik sira seluk, ne’ebé dala barak akontese durante faze dezlokasaun (fake-off) ka aterrizajen (leanding)  iha aeroportu.

Diretór Ezekutivu Aero Díli, Lourenço de Oliveira, konfirma ba Rafa,tl katak “insidente ki’ik” ka bird strike iha parte karuk (left side) husi aeronave, maibé kontinua voo (semo) ba Bali-Denpasar (Indonézia) no aterra ho seguru iha Aeroportu  Internasionál Ngurah Rai-Bali.

Lourenço de Oliveira informa katak hafoin aterra, parte sira Person In Charge/Pilot In Command (PIC)  no Expected Off-Block (EOB) halo verifikasaun vizuál ba motór  ida (#1) no deskobre katak, eziste problema ho kondisaun aviaun nian iha fan blade.

“Ami haré ida ne’e hanesan problema sériu ne’ebé bele kompromete seguransa aviasaun. Tanba ne’e, ami husu investigasaun imediata kona-bá kondisaun pista iha momentu insidente. Asaun koretiva hodi garante pista sempre livre husi manu no objetu perigozu sira seluk no husu halo melloramentu ba monitorizasaun no mitigasaun bird strike iha área aeroportu,” Lourenço de Oliveira hateten hodi haktuir mós rekomendasaun iha relatóriu Aero Díli  hato’o ona ba Prezidente Administrasaun Navegasaun Aéreu Timor-Leste (ANATL,E.P), Rumualdo António da Silva inklui koñesimentu ba  Prezidente  Konsellu Administrasaun Autoridade Aviasaun Sivíl Timor-Leste, (AACTL, I.P, sigla portugés) Zezinho António Gusmão.

Aero Díli ho sinseru iha esperansa katak ANATL bele fó asaun lalais hodi garante seguransa aviasaun iha Timor-Leste. Relasiona ho  insidente bird strike ne’ebé akontese ida-ne’e ba dala-tolu ona ba aviaun  Aero Díli no sai preokupasaun seguransa, hanesan reprezenta risku ba aeronave Aero Dili, liu-liu durante aterragem iha aeroportu Prezidente Internasionál Prezidente Nicolau Lobato, Díli.

“Ida-ne’e hamosu risku signifikativu ba seguransa aeronave, pasajeiru no tripulasaun, nune’e mós ba aviaun sira seluk ne’ebé opera iha Aeroportu Internasional Presidente Nicolau Lobato. Ami hein atu hetan resposta no asaun lalais,”  Lourenço de Oliveira haktuir iha relatóriu insidente aviaun Aero Díli nian ne’ebé submete ba ANATL,E.P.

Dau-daun ne’e aviaun Aero Díli A319 ne’ebé enfrenta “insidente” bird strike sei iha hela faze manutensaun iha Aeroportu internasionál Ngurah Rai, Denpasar-Bali, Indonézia no posivel Sábadu dadeer, 11 Abríl 2026, halo fali voo mai Díli.

“Ba pasajeiru sira ne’ebé tuir lolós tenke husi Denpasar mai Díli, ohin, Aero Díli responsabiliza hodi lori sira ba deskansa iha otél sira iha Bali no Sábadu dadeer, ho Aero Díli viajen ba Timor-Leste,” Maria Angela Oliveira, diretora jerál Aero Díli haktuir.

Jornalista: Elio da Costa/Editór: Vito Salvadór