Hali-Sanak Tohar Rezulta Karreta ho Motór Ida Aat no Estraga Travo Eletrisidade iha Estrada UNDIL Nia Oin

Hali sanak-boot iha parte eskola UNDIL nia oin tohar taka estrada diresaun Caicoli ba Balide no Balide tuun mai Caicoli.

Díli, 09 Abríl 2026 (RAFA.tl), — Estudante sira hamutuk ho abitante sira ne’ebé hela besik iha área eskola Universidade Dili (UNDIL) nian, Kinta ne’e, hale’u tuku 14.30 Otl, hakfodak ho insidente hali-sanak  iha área estrada eskola UNDIL nian ne’ebé tohar hodi taka metin estrada protókolu  diresaun Caicoli ba Balide no Balide tun mai Caicoli.

Tuir observasaun RAFA.tl nian hatudu katak hali-huun boot nia sanak tolu mak tohar tuun mai rai hodi hanehan  karreta ho marka Suzuki Alto ida no hanehan mós motór ida ne’ebé nain konsege haksoit sai salva an, maibé motór kuaze rahun totál.

Hali-sanak ho medida boot tohar estraga mós travo eletrisidade nian iha parte refere  no sanak balu baku kona moru eskola UNDIL nian.

Insidente ne’e la rezulta ema  ruma kanek, maibé fiu ka liña distribuisaun eletrisidade nian kuaze kotu hotu. Nune’e, eletrisidade sira parte área Caicoli, Kintal-Boot ba to’o Balide mate.

Liu tiha minutu 45 nia laran, entidade  relevante sira hanesan Polísia Nasionál Timor-Leste (PNTL), ekipa EDTL,E.P no guarda Servisu Protesaun Sivíl halo intervensaun hodi hadi’a hikas fiu sira ne’ebé kotu no tesi hali-sanak  boot ne’ebé monu taka estrada atu bele asegura fali movimentu transporte iha diresaun refere.

Iha intervensaun ne’e hamosu mós insidente ki’ik ida, pesoál tesi ai husi guarda Protesaun Sivíl  hetan kanek tanba korrenti mákina nian kotu kona nia ulun.

Parte sira evakua ona  pesoál ne’ebé kanek ba halo tratamentu iha ospitál ka sentru saúde ne’ebé besik.

Jornalista : Remigia Locateli/Editór: Vito Salvadór