Estadus Unidus Amérika Apoia Timor-Leste Hodi Avansa Kapasidade Komunikasaun Emerjénsia Nasionál

Primeiru-Ministru (PM), Kay Rala Xanana Gusmão simu audénsia ho Majór Jenerál Andrew J. Chevalier hasoru-malu ho iha Palásiu Governu, 31 Marsu 2026. Imajen/Média GPM

DÍLI, RAFA.tl– Estadus Unidus Amérika no Timor-Leste lansa Rede Komunikasaun Rádiu Emerjénsia foun, hodi marka momentu istóriku ida ba hametin kapasidade nasionál sira atu responde ba dezastre.

Notísia Relevante: Majór Jenerál Andrew J. Chevalier husi Guarda Nasionál Rhode Island Vizita Timor-Leste Hodi Avansa Parseria Estadus Unidus Amérika no Timor-Leste

Serimónia ne’e hala’o durante vizita ofisiál husi Majór Jenerál Andrew J. Chevalier, Adjuntu Jerál husi Guarda Nasionál Rhode Island, Estadus Unidus Amérika, ne’ebé ho ninia kompromisu hirak iha Timor-Leste mak foku liubá avansa kooperasaun seguransa, kapasitasaun resposta ba dezastre, no parseria institusionál sira.

Komunikadu ofisiál ne’ebé Rafa.tl asesu haktuir inisiativa ida-ne’e sei hasa’e Timor-Leste nia abilidade atu hatán ba emerjénsia, proteje ema nia vida, no hametin koordenasaun entre instituisaun prinsipál sira iha setór seguransa no sivíl.

Projetu ne’e dezenvolve liuhusi koordenasaun besik ho Ministériu Interiór, Autoridade Protesaun Sivíl (APC), no Polísia Nasionál Timor-Leste (PNTL), Programa Dezenvolvimentu Polísia Timor-Leste (TLPDP) Austrália nian, Gabinete Seguransa Rejionál Embaixada Estadus Unidus nian, no Komandu Indo-Pasífiku Estadus Unidus nian, no  sei fornese infraestrutura komunikasaun krítiku sira, inklui rádiu, sistema tore ba rádiu, no ekipamentu sentru xamada no operasaun emerjénsia nian, hamutuk ho formasaun téknika. Bainhira kompleta ona, rede komunikasaun rádiu emerjénsia ida-ne’e sei permite koordenasaun ne’ebé efikás liu entre PNTL, APC, F-FDTL, no servisu emerjénsia sira iha nível lokál no nasionál.

Inisiativa ne’e apoia Timor-Leste nia objetivu ne’ebé boot liu hodi kumpri padraun rejionál sira no avansa ninia integrasaun iha ASEAN, hametin instituisaun nasionál sira no kapasidade resposta emerjénsia nian. Projetu ne’e kontribui ba estabilidade no reziliénsia ba tempu naruk iha Timor-Leste no iha rejiaun Indo-Pasífiku laran.

Estadus Unidus Amérika sente orgullu fó apoiu ba esforsu ida-ne’e hodi hatán ba prioridade hirak-ne’ebé Governu Timor-Leste identifika ona no iha nafatin kompromisu atu serbisu hamutuk hodi hari’i futuru ida ne’ebé seguru liu, forte liu, no reziliente liután.

Reportajen Ekipa Rafa.tl