Prezidente Repúblika Parabeniza Nilton Gusmão Ba Investimentu Parque Industriál ETO iha Manatuto

Prezidente Repúblika, José Ramos-Horta. Imajen/Rafa.tl

DÍLI, RAFA.tl– Prezidente Repúblika (PR), José Ramos-Horta parabeniza na’in ba grupu empreza Esperança Timor Oan (ETO), Nilton Telmo Gusmão dos Santos ne’ebé ho vizaun no kompromisu boot hodi loke investimentu Parque Industriál ETO iha Munisípiu Manatuto atu kontribui ba dezenvolvimentu nasionál no hasa’e kreximentu ekonómiku Timor-Leste nian.

Notísia Relevante: Investimentu Parque Industriál ETO, Autoridade Suku Aiteas Orgullu ho Serteza Kampu Servisu Ba Joven Sira

Prezidente Repúblika (PR), José Ramos-Horta, ba jornalista sira iha Palásiu Prezidensiál, Tersa (31/03/2026), hatete, Diretór ezekutivu empreza  Esperança Timor Oan (ETO), Nilton Telmo Gusmão dos Santos, hatudu duni nia kompromisu ne’ebé matenek hodi halo investimentu Parque Industriál ETO iha Manatuto.

“CEO Nilton Gusmão di’ak tebes, hatudu ninia kompromisiu. Nia emprezáriu ida ne’ebé matenek halo parque industriál iha Manatuto no buat sira seluk ne’ebé nia halo,” Prezidente Repúblika José Ramos-Horta hateten.

Xefe Estadu rona mós katak Nilton Telmo Gusmão dos Santos sosa ona asaun iha  Timor Telecom, espera bele rekupera Timor Telecom sai telekomunikasaun ida ne’ebé modernu no profisionál hodi bele halo kompetisaun ho telekomunikasaun sira seluk hanesan Telemor no Telkomcel ne’ebé dau-daun ne’e eziste hela iha Timor-Leste.

“Nia mós sosa Timor Telecom maioria ne’e di’ak tanba Timor Telecom araska oituan, osan laiha, tinan hira nia laran apezar Governu, Estadu mós sosiu ho Timor Telecom nunka tau osan didi’ak ba Timor Telecom, estadu rasik deve millaun ualu ba Timor Telecom. Portantu, Nilton Gusmão kaer ne’e nia bele rekupera Timor Telecom bele sai telekomunikasaun ida modernu profisionál ne’ebé bele konkorente ho Telemor no Telkomcel,” Ramos-Horta tenik.

Prezidente Repúblika, agradese no fó parabens ba CEO ETO , Nilton Gusmão no mós emprezáriu Timoroan sira seluk, merese respeitu sira, apóiu sira maka’as tebes ba ida ne’e tanba sira mak sai hanesan pioneiru emprezáriu ne’ebé tau sira nia osan, balun sira husu empréstimu, empresta banku todan tebes, maibé parabéns no obrigadu boot ba sira.

Investimentu Parque IIndustriál ETO iha Manatuto, ofisialmente hatúr fatuk dahuluk husi Primeiru-Ministru Kayrala Xanana Gusmão iha loron 30 fulan-Marsu 2026.

Parque industriál ne’e sei iha instalasaun unidade Industrial lima, mak hanesan fábrika produsaun kaixa, fábrika estrutura metáliku H-Beam, fábrika prosesamentu sardina enlatada, matadouro ka industria prosesamentu na’an no fábrika benefisiamentu háre.

Projetu investimentu ETO nian iha Parque Industriál Manatuto ne’e reprezenta investimentu entre millaun 13 to’o millaun 15 dólar amérikanu.

Durante faze konstrusaun estimasaun hatudu katak sei kria postu servisu  entre 150 to’o 200 ho previzaun atu remata iha fulan-Agostu, tinan oin.

Reportajen ekipa Rafa.tl