PM Xanana Garante Ba Prezidente Repúblika Rezerva Kombustível Too Fulan-Neen

Primeiru-Ministru Kay Rala Xanana Gusmão. Imajen/Rafa.tl

DÍLI, RAFA.tl-Iha enkontru semanal ho Prezidente Repúblika (PR), José Ramos-Horta, Kinta (26/03/26), iha Palásiu Prezidensiál, Primeiru-Ministru (PM), Kay Rala Xanana Gusmão,  garante ba Xefe Estadu rezerva kombustível  to’o fulan-neen hodi atende konsumidór nasionál.

Notísia Relevante: Governu Aprova Medida Temporáriu Estabiliza Folin Kombustível

“Horiseik, iha Konsellu Ministru, ami halo rezolusaun balun, ida temi kona-bá kria komisaun ida atu haré ba presu petróleu, buat sira ne’e hotu oinsá no komisaun sei haré se karik bele ita garante too fulan-neen para labele falta,” Xanana Gusmão hateten.

Molok ne’e, Governu públika ona Dekretu-Lei N.° 13/2026 de 25 de Março, Kona-bá Medidas de Estabilização Temporária do Preço dos Combustíveis e Segurança de Fornecimento.

Iha Artigu 2  kona-bá estabilizasaun presu ba konsumidór sira, ho  flutuasaun presu kombustível iha Timor-Leste, ne’ebé mosu husi konflitu iha Médiu Oriente, no nesesidade atu asegura estabilidade merkadu,  maka Governu determina katak presu másimu ba kombustível sira labele liu husi nivel ida ne’ebé asesível ba konsumidór sira, no fixa limite sira hanesan tuir mai:

• Gasolina US$1.50 kada litru;
• Gasóleu US$1.65 kada litru;
• Avtur: US$2.50 kada litru;
• Gáz (LPG): US$4.20 kada kg.

Iha sorumutu ho Xefe Estadu ne’e, Xanana mós informa kona-bá prosesu rekrutamentu kadetes Polísia Nasionál Timor-Leste (PNTL) 2025, ne’ebé Komisaun Monitorizasaun no Fiskalizasaun Konkursu Públiku identifika evidénsias sufisientes lubun ida hodi hatudu ezisténsia irregularidades materiais ne’ebé grave iha prosedimentu konkursu nian ne’e no governu deside kansela hodi halo hikas selesaun tuir prosesu ne’ebé iha.

Biban ne’e Xefe Estadu ho Xefe Governu partisipa  mós iha enkontru Konsellu Superiór Defeza no Seguransa, hodi haré  ba kestaun seguransa no defeza Nasionál no mós kooperasaun ba segura rejionál no internasionál.

Reportajen ekipa Rafa.tl