Servisu Migrasaun Iha Ona Karimbu Taka Ba Pasaporte iha Pontu Entrada no Saída

Ministru Interiór, Francisco da Costa Guterres. Imajen/Rafa.tl

DÍLI, RAFA.tl– Ministériu Interiór liu husi Unidade Servisu Migrasaun hahú uza fali ona karimbu (stamp) hodi taka ba sidadaun sira nia pasaporte iha pontu entrada no saída iha fronteira terrestre Timor-Leste.

Ministru Interiór, Francisco da Costa Guterres ba jornalista sira iha Palásiu Governu Díli, Kuarta (25/03/2026), konfirma katak servisu Migrasaun iha pontu entrada dau-daun ne’e iha ona karimbu (stamp) hodi taka ba komunidade sira ne’ebé halo hela viajen ba mai Timor-Leste ho Indonézia.

“Foin dau-dauk ne’e laiha, tanba fábrika sira mak lori tempu naruk, maibé rezolvidu ona,”  Ministru Interiór, Francisco da Costa Guterres hateten.

“Sira agora uza tiha ona karimbu (stamp), ne’ebé ita rezolve ona no  agora kualker ema tama di’ak hela. Agora sira uza tiha ona karimbu tanba kestaun kuandu ita halo mudansa iha tinan mai ne’e mak sira hanoin prosesu ne’e lalais, mais afinal mudansa fábrika sira lori tempu fila-fali maibé ita resolve,”    Ministru Francisco da Costa Guterres tenik.

Governante ne’e haktuir, sidadaun sira ne’ebé tama mai  Timor-Leste husi pontu entrada sira, hanesan Aeroportu no postu fonteira Terrestre nian, pesoal sira ne’ebé servisu iha pontu entrada sira kontinu halo vizilánsia.

“Husu apóiu sidadaun sira nian, karik imi identifika ema estranjeiru ruma iha imi nia let mak illegal, informa lalais ba parte relevante hodi halo atuasaun,” nia fó hanoin.

“Sira mai ne’e ita tenta hodi kontinua halo vizilante ba sira, tanba ne’e husu ita hotu-hotu nia apóiu, se imi deteta ema ruma mak iha ilegal favor ida informa para imigrasaun bele kontinua hala’o sira nia servisu, tanba dala barak ita nia tasi no rai luan hela, dalabarak ita kontrola mak menus ema bele tama ita la hatene,” Ministru Francisco Guterres hateten tan.

Ministru Interiór subliña, servisu Migrasaun kontinua halo vijilánsia hodi la’o no halo kontrola nafatin, husu nafatin ba komunidade no líder komunitáriu hotu nia apóiu, karik deteta ema ruma iha ne’ebá mak haré katak iha deskonfia, ema ne’e estrajeiru, ilegal ruma karik, favor informa hela ba polísia imigrasaun no Polísia komunitáriu atu informa ba hodi halo vizilante ba ida ne’e hodi buka tuir nafatin atu ema ilegal sira labele tama mai rai doben Timor-Leste.

Reportajen ekipa Rafa.tl