Governu Hahú Diskusaun ho Aero Dili Kona-bá Preparasaun Sira Timor-Leste Asume Prezidénsia ASEAN iha 2029

Ministru Transporte no Komunikasaun (MTK), Miguel Marques Gonçalves Manetelu. Imajen/Rafa.tl

DÍLI, RAFA.tl– Governu Timor-Leste liu husi Ministéiru Transporte no Komunikasaun (MTK) hahú halo diskusaun ho kompañia Airline Aero Dili kona-bá  kondisaun no preparasaun sira hodi faislita konetividade aeréu  bainhira Timor-Leste assume prezidénsia ASEAN iha tinan 2029.

Notísia Relevante: Aero Dili Sei Hasa’e Folin Billete 20% no Citilink Mós Sei Hasa’e

Ministru Transporte no Komunikasaun, Miguel Marques Gonçalves Manetelu, ba jornalista sira iha Palásiu Governu, Kuarta (25/03/2026), informa iha loron ida antes nia konvida empreza Aero Dili halo enkontru iha nia gabinete hodi hahú haré preparativu sira no oinsá iha kooperasaun atu garante konetividade aeréu durante Timor-Leste asume responsabilidade  prezidénsia ASEAN.

“Ha’u bolu CEO Aero Dili, Lourenço  de Oliveira, tanba  iha ámbitu aprezentasaun Relatóriu Dezempeñu Ekonómiku  Timor-Leste 2025 husi BCTL, Segunda (23/03/2026), iha Sentru Komvensaun Díli (CCD,) ita haré para oinsá mak medida sira ne’ebé  ita atu foti karik iha futuru ne’e atu labele hamate ita-nia kompaiña Timoroan,” Ministru Miguel Marques Gonçalves Manetelu informa.

Ministru Transporte no Komunikasaun ne’e esplika, Estadu no governu nia obrigasaun  mak  asina air service agreement, agora aviaun atu semo ka la semo ne’e depende ba kompaiña airline sira.

“Ita asina ona ho nasaun barak, maibé ita foin semo ba nasaun balu, agora Aero Dili halo esforsu atu semo ba Austrália iha loron 28 no atu ba tán Malázia, ne’e tanba ita asina ona air service agreement ho nasaun sira ne’ebé Estadu no governu to’o iha ne’eba tanba ne’e la’ós kompaiña governu nian be ita mak deside semo ba ne’ebá, ne’ebé nia hakarak semo ba ne’ebé ne’e nia direitu tanba governu loke tiha dalan ona,” Nia esplika.

Kona-bá proposta operasaun AirAsia ho rota Denpasar mai Dili no Dili ba Denpasar, Ministru Miguel Manetelu, hateten katak buat ne’ebé governu liu husi Ministéiru Transporte no Komunikasaun atu foti deizasaun iha momentu ida nia sei bolu mídia sira hodi ko’alia ba asuntu ne’e.

Reportajen ekipa Rafa.tl