Polísia Detein Ona Suspeitu Ne’ebé Oho Veronica dos Santos iha Praia dos Coqueiros

Matian Veronica dos Santos nia isin-mate latan hela iha estrada Praia dos Coqeiros, Díli, Sábadu dadeer (21/03/2026), hale’u tuku 4:50 Otl. Imajen/Foti iha Facebook

DÍLI, RAFA.tl – Polísia Nasionál Timor-Leste (PNTL) Munisípiu Díli halo ona detensaun ba suspeitu ho inisiál CdA nu’udár katuas-oan ne’ebé deskonfia oho nia ferik-oan Veronica dos Santos iha Estrada ibun Praia dos Coqeiros, Díli, Sábadu dadeer (21/03/2026), hale’u tuku 4:50 Otl.

Komadante PNTL Munisípiu Díli, Komisáriu-Asistente Polísia Orlando Gomes, informa Veronica dos Santos mate deskonfia oho husi nia katuas-oan ho inisiál CdA.

“Kazu ida-ne’e patrollamentu to’o kedas iha fatin asegura lokál krime no ita kontaktu ba iha Forensik atu bele mai foti mate-isin lori ba iha Mortuariu Ospitál Nasionál Guido Valadares (HNGV).  Polísia kaptura ona suspeitu ho inisiál CdA lori ba detein kedas iha  Komandu Polísia Munisípiu Díli hodi submete ba iha prosesu investigasaun no kontinua ba iha Ministériu Públiku (MP),” Komisáriu-Asistente Polísia Orlando Gomes, informa ba jornalista sira iha Sentru Formasaun Polísia, Comoro.

Orlando Gomes afirma kona-bá  motivu husi insidente ne’ebé envolve suspeitu nu’udar katuas-oan hodi oho nia ferik-oan Veronica dos Santos seidauk bele fó sai ba públiku tanba iha hela prosesu investigasaun.

Mate-isin Veronica dos Santos, ne’ebé moris iha Díli iha loron 09 fulan-Setembru tinan 2005 iha Aldeia Anin Fuik, Suku Madohi, Postu Administrativu Dom Aleixo, parte Polísia Forensik evakua ona ba iha Mortuariu HNGV hodi halo prosesu autopsia.

Iha fatin seluk matebian Veronica dos Santos ho naran istimada Veve nia inan-rasik,  Luisa Francisca da Silva, haktuir katak molok insidente to’o nia oan Veve mate ne’e mosu uluk violensia ne’ebé nia katuas-oan CdA halo hasoru nia tanba iha diverjensia balun entre sira-nain rua nia uma-kain.

“Kalan ne’e, Veve fase hotu tiha bikan no dasa hotu tiha rai, depois nia haris, ha’u husu noi atu ba ne’ebé? matebian hatan atu ba halimar bingo iha viziñu sira, nune’e ha’u bandu nia  no husu nia lalika la’o sai, bainhira ami toba hela, dadersan Polísia sira mai fanun ha’u hakfodak dehan ami ba tuir haré Veve iha ospitál,”  Luisa Francisca da Silva  haktuir ho matan-been.

Família sira tuir ba iha HNGV haré sira-nia oan nia isin-mate, ne’ebe Polisia fó hatene ba família katak  Suspeitu asegura ona iha sela  Polísia Díli.

Família ho triste ne’ebé kle’an entrega kazu ne’e ba parte kompetente atu prosesa tuir Lei ne’ebé vigora  tanba suspeitu la’ós ema seluk no leet, maibé deskonfia Veve nia katuas-oan rasik.

Ekipa Reportajen Rafa.tl