Xanana Garante Kombustível La Falta To’o Tinan Nia Rohan

Primeiru Ministru, Kay Rala Xanana Gusmão. Imajen/Rafa.tl

DÍLI, RAFA.tl – Primeiru-Ministru (PM), Kay Rala Xanana Gusmão, hatete, Governu liu husi Ministériu Petróleu no Rekursu Minerais (MPRM) hamutuk ho importadór sira estuda nafatin situasaun globál oinsá mak Timor-Leste garante kombustível la falta to’o tinan nia rohan (fim do ano).

Notísia Relevante : Presu Kombustível Mundiál iha Kuarta-Ne’e Sa’e Ona Ba US$103,42 Kada Barríl

Primeiru Ministru, Kay Rala Xanana Gusmão, ba jornalista sira iha Palásiu Prezidensiál, Kinta (19/03/2026) hatete, presu mina sa’e, maibé la’os sa’e maka’ás, funu Médiu Oriente bainhira los mak atu hotu, maibé sei aumenta tanba ne’e mak Konsellu Ministru hamutuk ho Ministériu Petróleu Rekursu Minerais no importadór kombustível sira haré ona oinsá garantia estoke kombustível to’o tinan ne’e nia rohan.

“Ha’u informa mós ba Prezidente Repúblika kona-bá presu kombustível sa’e, maibé la’ós sa’e ida  aat liu. Ita akompaña, karik funu iha Médiu Oriente ita lahatene bainhira mak funu ne’e hotu, kala sei sa’e tan tanba ne’e mak Konsellu Ministru mós ho Ministru Petróleu no Minarais hamutuk ho importadores mina ita-nian, importadores gas no gazolina buat sira ne’e hotu, sira sei haré no estuda nafatin nusá mak ita tenke garante to’o tinan ne’e nia rohan la falta kombustível,” Xanana Gusmão hateten.

Xefe Governu haktuir, kuandu temi dehan la falta kombustível la’os de’it mai iha Timor-Leste, maibé iha fatin barak sei hetan, ne’ebé atu dehan katak sei hadau malu kombustível ne’ebé garantia katak sei la falta, la signifika  iha garantia tomak. Kombustível ne’ebé gasta agora ne’e ba to’o iha ne’ebá mais maizumenus sei la falta.

“Ohin loron mós motór ho karreta de’it barak los, sa tan iha engrafamentu ruma ne’e minutu lima tan ita la’o metru rua, ne’ebé sei aviza ba sosiedade tomak atu redus dau-dauk ona, tanba lae ita bele hetan kombustível to’o tina rua mós fulan tolu no haat la’o ba la’o mai halimar de’it, ne’e kombustível sei hotu tanba buat ne’e la’os mai ita de’it, maibé mundu tomak tanba ne’e garantia katak oinsá mak povu sosa kombustível ne’e presu la bele sa’e maka’ás liu,” Xanana tenik.

Primeiru-Ministru subliña, kombustível folin sa’e tanba akontese  funu iha Médiu Oriente sei provoka falta ai-han, ne’ebé mós bele konsidera tanba produsaun seidauk boot, buat sira ne’e hotu mak Governu mós haré ona oinsá mak garante hahán to’o iha tinan nia rohan.

Reportajen Ekipa  Rafa.tl